Vawiin khan 8th  National Voters Day chu I&PR Conference Hall, Mamitah hman a ni a, Pu Jacob Lalawmpuia, Addl DC, Mamit chuan khuallian niin a hmanpui.

He hun hmanpuitu Pu Jacob Lalawmpuia, Addl DC, Mamit chuan  kalkhawmte chungah lawmthu a sawi a, a bik takin vote nei thar kum 18 tling tharte chu thinlung taka a lawmpui thu a sawi a ni. Addl DC chuan vote nei tharte chu India khua leh tui nihna dik tak leh ram rorelnaah kan ngaihdan leh tha kan tihdan kan vote hmangin kan sawi ve thei tawh dawn a ni a ti.

Khuallian chuan tuma chhuhsak theihloh kan chanpual chu thil dang dang sakhuana leh engemaw vang mai mai te'n kan rilru kan tibuai tur a ni lova, kan chhia leh tha hriatna thiang tak hmangin India ram Democracy ramah hian kan vote hmangin tih ve theih kan nei a ni tih kan inhriat thar a tul tak meuh meuh a ni a ti.

 8th National Voters Day puala inkhawm hi  Pu J. Miahlung, Election Officer, Mamit chuan a kaihruaia,  Pi Lalzikpuii, SDC/AERO, Mamit chuan Vote neih hlutna tih hmangin a lem nen entirna a pe a, Political party hrang hrang aiawh ten thusawina an nei a, CEC Message thlirhona neih a nih bakah kalkhawmte chuan Vote nei pawimawhna leh hlutna thutiam tharna an nei bawk.

8th National Voters Day-ah hian Mamit District chhung Constituency pathum atangin BLO tha pathum thlanchhuah an ni a, chungte chu 1-Hachhek Constituency atangin Lalfakzuala Ralte, Zawlnuam, BLO, 2-Dampa Constituency atangin Vanlalzawta, Reiek -I BLO, 3-Mamit Constituency atangin K. Lalmuankima, Phaizau BLO te thlan an ni.

National Voters Day lawmna hunah hian Mamit khawpui chhunga political hrang hrang, Vote nei thar te leh BLO te an tel a ni.