Vawiin hian DC Conference Hall Serchhipah National Voters’ Day vawi 8 na hman a ni a, District Election Officer leh Bawrhsap ni bawk Pi Sangchhin Chinzah chu khuallian a ni.
Khuallian chuan zalenna awm lohna leh tihluihna hmanga rorelna ram hrehawmzia hre chiangtuten, zalen taka mipuiten ram hruaitu an thlanna rama chen an chak thin a, kei ni khawvela Democracy ram lian bera chengte hian zalenna hlut zia kan hriat thar a tul a ni, a ti a. Mipuiten kan duh zawng leh kan ram tana tha tur mi kan thlan theih nan Electoral Roll felfai tak kan neih a tul a, sawrkarin Electoral Roll-a hming chuang thei tur chin a bithliah, kum 18 tling chinte Roll-a khung vek pawh thil harsa tak ani chungin Booth Level Officer te leh thawktute inpekna azarah Roll tha tak kan nei thei hi a lawmawm ani ti bawk.
Electoral Roll-a hming ziah luh mai hi a tawk lova, mawhphurhna kan nei tih hriaa, mahni chhia leh tha hriatna hmanga kan ram tana hruaitu tha ni a kan hriatte thlangtu tur kan ni tih in hriain, chi bing leh hnam bil rilru te paih bo turin vote nei tharte a chah a ni.
Voters’ Day hmannaah hian Serchhip District chhunga Assembly Constituency pathuma Booth Level Officer ti tha zual (Best BLO) hnenah khuallian hian lawmman, Citation leh Rs. 3000 theuh hlanna a nei nghal a. Hrangturzo Constituency atangin Pi Germanthangi, Tuikum Constituency atangin Pu Lalrinenga leh Serchhip Constituency atangin Pu K. Lalrosanga ten lawmman hi an dawng ani. Tin, Bawrhsap hian Electoral Roll thar bera hming chuang thar thlan chhuahte hnenah EPIC a hlan bawk.
He hun hi Pu Abraham Beirazi Khithie, Election Officer chuan a kaihhruai a. Pu Vabeimozachhi Chozah, SDC leh AERO 27 Tuikum A/C kaihruaina in Voters’ Day Thutiam sawi rualna neih a ni bawk.
