Vawiin chawhma dar 11:30 khan PHE Department, Serchhip WATSAN Division leh Swachh Bharat Mission (Gramin), Serchhip District tangkawp chuan Swachh Republic Week 2018 (20-26 January, 2018) denchhenin Sustainability of ODF cum Swachh Bharat Kosh (SBK) Awareness Campaign an buatsaih a, District Bawrhsap Pi Sangchhin Chinzah chuan khuallian niin a hmanpui.
Khuallian, Pi Sangchhin Chinzah chuan, pawnlera inthiar chu a hrisel lohzia mipuiten an hriat avanga District pum pawh pawn lera inthiar awm lohna Open Defecation Free (ODF)-a inpuang thei an nih thu a sawi a, naupangte hnenah ODF pawimawhzia zirtir chhoh zel chuan thangthar lo la awm zel turte pawhin nunphungah an nei zui zel dawn a ni, a ti. District pum ODF-a kan inpuan tawh avangin faina kawnga hmalak lam a pawimawh zual ta a, inzirtirna nasa zawk neih a tul hle dawn a ni. Khaw chhungin faina kawnga hma a sawn chak loh chhan tam ber chu kan thatchhiat vang a ni fova, khaw vawnfai chu a khaw neitute bawkin a hlâwkna an tel avangin mahni chenna khua theuh vawnfai kawnga hma la turin kalkhawm te a chah a ni. District Bawrhsap hian Serchhip District chhunga Block pahnih - Serchhip leh E.Lungdar Block te hnenah ODF Certificate a hlan bakah District chhunga khaw 37 te hnenah ODF Certificate a hlan a ni.
He hun hi, Er. F.Lalsanglura, Sr. EE, PHED, Serchhip chuan a kaihruaia, Serchhip District chhunga khaw hrang hranga khawtlang hruaitute kal khawmin, Resource Person Er. K.Zohmingliana, Sr. EE, PHED, Rural, Aizawl chuan ODF chhawm nun zel dan tur zirtirna a pe a, chumi hnuah Swachh Kosh chungchang sawihona neih zui niin, zawhna leh chhanna hun te pawh hman a ni.
