2485/2025-2026

Dated Serchhip, the 2nd December, 2025: 8th Rashtriya Poshan Maah (National Nutrition Month) 2025-a Serchhip District in ‘Best Performing District’ a lawmman pahnihna a dawn lawmna chu vawiin khan Sub-Hqrs. YMA Serchhip Hall-ah neih niin District Bawrhsap Pu Paul L. Khuma chuan khuallian niin he hun hi a hmanpui a ni.

Serchhip District in ‘Best Performing District’ a lawmman pahnihna a dawn lawmna hunah hian Bawrhsap Pu Paul L. Khuma chuan intihsiakna hrang hrangah lawmman lak a harsat thin thu sawiin, Mizoram puma District hrang hrang ten Rashtriya Poshan Maah 2025 puala inelna an neihah Serchhip District in lawmman hlu tak a dawng chu lawmawm a tih thu leh he lawmman kan lak hian he hmalakna a thawktute hnathawh a langchiang hle tih a sawi a. Serchhip District tana theihtawp chhuah zel tur leh nu leh naupang ten hmalam hun eng zawk an neih theihna tura theihtawp chhuah zel a, an kawng atana lo eng zual zel turin a chah a ni. Serchhip Bawrhsap chuan he huna kalkhawmte chu nu te pawimawhna hre reng tura chahin, chumi rual chuan nu te pawhin an pawimawhna an hriat reng a tul thu a sawi bawk a ni.

He hunah hian Women and Child Development Department Joint Director leh Serchhip DPO mawhphurhna la mektu Pi Sailopari chuan kum 2018 atang khan kumtin Rashtriya Poshan Maah hi hman thin a nih thu leh kumin a Rashtriya Poshan Maah-ah hian District hrang hrang leh ICDS Project ten ngaihtuahna tha tak tak an neih te phochhuah a nih theih nan inelna an buatsaih thu a sawi a, chu inelna ah chuan Serchhip District in lawmman pahnihna a lak lawmna chu an buatsaih thu a sawi a ni.

Hemi rual hian Beti Bachao, Beti Padhao (BBBP) hnuaia WCD Department in School an adopt, Govt. High School Serchhip-a zirlaite tan 'Promise Ring' semna neih nghal a ni a, hemi atan hian zirlaite chuan ruihhlo laka fihlim turte, mipat hmeichhiatna hmankhawloh laka fihlim tur leh an zirlaite tha taka zira thawhchhuah an neih hma loh chuan nupui pasal nei lo tura thu tiamin, zirlaite hnenah hian Bawrhsap hian Zungbun a hlan bawk a ni.

Vawii a he hun hman ah hian Pu James Lalremliana, District Coordinator, Poshan Abhyan leh Pu Lalvensanga, District Mission Coordinator, Mission Shakti te bakah District Child Protection Unit, Mission Vatsalya leh Serchhip leh East Lungdar ICDS Project te atangin an hmalakna hrang hrang ngaihthlak a ni bawk.