Tripura Bru Relief Camp atanga Bru hruai kir 9th Batch Repatriation September ni 30 (Thawhtanni) atanga tan chu tluang taka kalpui zel niin tun dinhmunah chhungkaw 48 atangin mi 181 Lunglei District thlen pui an ni tawh a. He repatriation hna chhunzawm zel turin tukin zing dar 6:30 khan a thawh thumna hna thawk turin Lunglei District Bru Repatriation official-ten Lunglei an chhuahsan.

Liaison Officer pathum - Pu Zonunsanga Colney, Pu Lalhriattira Fanai, Dr Malsawmtluanga te kaihhruaiin Supporting Staff mi paruk (6)  leh venhimna hna thawk tur police paruk (6) ten Mamit khua an pan mek. Tin, thawh hnihnaa Lunglei chhuahsan Lunglei SDC Pu Lalsanglura hovin official engemawzat repatriation hna buaipui hian Mamit District ah an la cham a ni.

Bru Repatriation hna thawk tura zin chhuak te pual hian tukin zing dar 6 ah khan thlahna hun tawi Lunglei DC Office kawtzawlah hman a ni a. Lunglei DC Pi K. Lalrinzuali, SP Pu C. Lalthanmawia, leh a kaihhnawih official dangte an tel. Capt Richard Vanlalnghaka’n hunserh hmangin tawngtaiin official-te hi thlah an ni.

9th Batch Bru Repatriation ah hian Lunglei District ah Bru chhungkaw 364 an zavaiin mi 2051 hruaikir tur niin Khakchangpara camp atangin chhungkaw 3, Hamsapara Camp atangin chhungkaw 2,Naisingpara Camp atangin chhungkaw 54 leh Hazacherra camp atangin chhungkaw 305 an ni. Heng chhungkaw 364 te hi Lunglei District huam chhunga khaw pali- Putlungasih – chhungkaw 121, Chawilung S – chhungkaw 43, Dinthar – chhungkaw 187, leh Buknuam – chhungkaw 13 ah hruai kir tur an ni. Tun dinhmunah a thawh khatnaah (3rd – 6th October, 2019) chhungkaw 42 atangin mi 165 leh a thawh hnihna (15th – 19th October, 2019) ah chhungkaw 6 atangin mi 16 hruai kir tawh an ni. Repatriation hna hi November ni 3 (Sunday) thlenga kalpui tura ruamhan siam phawt a ni.