Tripura Bru Relief Camp atanga Bru hruai kir 9th Batch Repatriation thawh khatna ah 6th October, 2019 (Saturday) khan chhungkaw 42 atangin mi 165 Lunglei District rawn thlen pui an nih hnuin tukin zing dar 6:30 khan a thawh hnihna hna thawk turin Lunglei District Bru Repatriation official-ten Lunglei an chhuahsan.

Liaison Officer pali - Pu Lalsanglura, SDC, Pu Lalthakima Chhangte, SDC, Pu Z. Lalthanliana Langva Asst Professor, Pu Lalthanmawia, Asst Professor te kaihhruaiin Supporting Staff mi pariat (8) ten Mamit khua an pan mek. Tin, security supervisor tura ruat Lunglei Dy SP (Hqrs) Pu J. Rokima kaihhruaina hnuaiah venhimna hna thawk turin police paruk (6) an tel a ni. Repatriation thawh hnihna atan hian Aizawl City Bus sawm leh panga (15) hire a ni a. Lunglei District team hi official, supporting staff, security leh driver-te nen an zavaiin mi 66 an ni. Programme duan lawk dan chuan Lunglei team-te hian vawiinah Mamit pan nghalin zaninah Minority Inn, Mamit (DRDA Lodge) ah an riak anga, naktuk (16th October, 2019) hian Tripura Camp pan nghalin Kanchapur (Dak Bangla) ah an riak ang. 17th October, 2019 (Thursday) hian 5th IR Bn Luangpawl panin Bru Relief Camp an rawn chhuahsan ang.

Bru Repatriation hna thawk tura zin chhuak te pual hian tukin zing dar 6 ah khan thlahna hun tawi Lunglei DC Office kawtzawlah hman a ni a. Lunglei DC Pi K. Lalrinzuali, SP Pu C. Lalthanmawia, CMO Dr Thani Pachuau leh a kaihhnawih official dangte an tel. Rev Vanlalmuankima’n hunserh hmangin tawngtaiin official-te hi thlah an ni.

Lunglei DC Pi K. Lalrinzuali chuan he hunah hian thu sawiin Bru repatriation hna kal mek chu sawrkar laipui Ministry of Home Affairs in uluk takin a vil reng thu sawiin he hna thawk tura ruat te chu ram pum huap hna pawimawh thawk tur an nih avangin an mawhphurna a san zia hre nawn turin a chah a. Repatriation hna a mawhphurna neite a bik takin Liaison Officer (LO) te chu uluk leh fimkhur taka hna an thawh a tul tur thu a sawi. An zinkawng a thui avang leh hmun thenkhatah kawng te a that tawk loh avangin fimkhur tak leh hmanhmawh lova kal tur leh mahni hriselna theuh ngai pawimawh turin a chah a ni. Repatriation hna kalpui naah zaidam leh dawhthei taka an mi hruai te enkawl tura chahin tawngtaina nen an hna tha taka hlen chhuak turin a chah nawn bawk.

9th Batch Bru Repatriation ah hian Lunglei District ah Bru chhungkaw 364 an zavaiin mi 2051 hruaikir tur niin Khakchangpara camp atangin chhungkaw 3, Hamsapara Camp atangin chhungkaw 2,Naisingpara Camp atangin chhungkaw 54 leh Hazacherra camp atangin chhungkaw 305 an ni. Heng chhungkaw 364 te hi Lunglei District huam chhunga khaw pali- Putlungasih – chhungkaw 121, Chawilung S – chhungkaw 43, Dinthar – chhungkaw 187, leh Buknuam – chhungkaw 13 ah hruai kir tur an ni.

Repatriation thawh khatna ah chhungkaw 42 (mi 165) Lunglei District rawn thlen pui an nih hnuin Tripura Relief Camp ah Lunglei District a rawn let tura chhiar chhungkaw 322 atangin mi 1886 an la awm a ni. Hengte hi Hazacherra Camp ah chhungkaw 268 (mi 1540), Naisingpara Camp-ah chhungkaw 50 (mi 320), Khakchangpara Camp ah chhungkaw 2 (mi 18) leh Hamsapara Camp-ah chhungkaw 2 (mi 8) ah an awm mek a ni.