Chief Minister Pu Zoramthanga chuan tukin khan Lengpui Airport atanga Aizawl leh Guwahati inkar thlawhna service thar GoAir chu a vailiam. Kumin February ni 10 a Jet Airways in Mizoram leh India hmarchhak state danga service a tihtawp hnu a Mizoram leh Assam inkara thlawhna service neih leh hmasak ber a ni a. GoAir thlawhna hi Airbus 320 niin, vawiin atanga October ni 26 thleng hian Guwahati leh Aizawl inkar service bakah October ni 27 atangin Kolkata service a awm tel dawn bawk a ni.

GoAir flight service lawmna inkhawmah Chief Minister chuan hun rei tak Mizoram mipuiten an lo nghah hnua Aizawl leh Guwahati inkar thlawhna service a awm leh ta chu lawmawm a tih thu a sawi a. Damlo inenkawl tum te leh zirna leh hna thil avanga zinchhuah ngaite bakah Mizorama rawn khualzin turte tan he thlawhna service hi a pawimawh thu te, service a awmloh hun chhunga mi tam takin harsatna an lo tawh phah thu a sawi. GoAir bakah flight service dangte a awm belh zel a beisei thu leh chumi atan chuan Lengpui Airport pawh kawng hrang hranga thuamthat hna thawh a, hmalakna thar siam belh mek zel a nih thu Chief Minister chuan a sawi bawk.

Airport Authority of India (AAI) Regional Executive Director Pu Sanjeev Jindal pawhin thu sawiin, Mizoram Chief Minister thahnemngaihna leh hmalakna avanga Guwahati leh Aizawl inkar thlawhna service a awm leh ta chu lawmawm a tih thu a sawi a. Heng khawpui pahnih inkara flight service siam hi sum siamna lam aiin mipui mamawh phuhruk tumna a nih zawk thu a sawi. GoAir Vice President Harjinder Singh Bhasin chuan Mizoram sawrkar hmalakna chungah lawmthu sawiin, he thlawhna service thar hian tourism hmasawnna kawngah pawh rah tha a chhuah a beisei thu a sawi.

He hunah hian Chief Secretary Pu Lalnunmawia Chuaungo chuan kalkhawmte lawmna thu sawiin, GAD Commissioner Pu Ashish Kundra chuan lawmthu sawiin hun a khar a. Pu C. Lalramzauva, Adviser to CM, DGP Pu S.B.K. Singh, Civil Aviation Principal Consultant Wing Commander Pu J. Lalhmingliana leh sawrkar hotu pawimawh dangte leh AAI atanga he hun hmang tura lo kalte an tel a ni.

Vawiin ni 15 atanga ni 26 October 2019 chhung hian Guwahati - Aizawl pan tur hi zing dar 6:50 ah chhuak in, Aizawl atanga Guwahati hi zing dar 8:40 ah Lengpui atangin a chhuak ang a, dar 9:50 ah a thleng ang a. Ni 27 atangin Kolkata - Aizawl thlawk hi zing dar 10 ah lo chhuak in dar 10:55 ah a lo thleng ang a. Aizawl atanga Guwahati pan in dar 11:25 ah a chhhuak ang a. Guwahati atanga Aizawl pan in chawhnu dar 1:15 ah thlawk chhuak leh in, Aizawl atanga Kolkata pan in chawhnu dar 3:05 ah Lengpui atangin a chhuak dawn a ni.

GoAir hi airline man tlawm, sumdawng company lian Wadia Group ta a ni a. November 2005 khan airline operation hi kalpui tan in, nitin flight 325 a nei thin a. Aizawl hi ramchhunga service a neihna khawpui, domestic destination 25-na a ni.