Vawiin kha khawvel pum huap kut sil fai ni, 'global handwashing day' a ni a, Lawngtlaiah chuan Lawngtlai District SSA Mission Mid-day Meal Cell bul tumin Govt Model English School-ah hman a ni.

He hun, SSA Mission Co-ordinator Pu H. Lalmuanpuia kaihhruaiah hian Lawngtlai District Bawrhsap Pi Shashanka Ala, IAS chu khuallian niin, hriselna uluk leh kut sil fai chungchangah zirlaite fuihna thu a sawi a. Lawngtlai Chief Medical Officer (CMO) office lam atangin kut sil fai pawimawhzia leh kut sil fai dan tur zirtirna ngaihthlak a ni a. Sikul naupangte hnen atangin thu chham leh mal zai te ngaihthlak a ni a. Khuallin hovin kut sil dan dikin kut sil chhin nghal a ni bawk.

Global handwashing day hi kum 2008 atang khan kum tin October ni 15-ah hman thin a ni a. Sahbawn hmang ngeia uluk taka kut sil fai thin tura inzirtir thar nan hman thin a ni. Kum tin thupui thlan bik 'theme' neih thin a ni a, kumin hian thupuiah 'mi tin tan kut fai' (clean hands for all) tih hman a ni.