Vawiin khan CTI, Sesawng-ah 9th Batch Mizoram Excise & Narcotics Constable leh 38th Batch Mizoram Home Guards and Civil Defence (MRHG & CD) volunteer ten passing out an nei a, he hun hi Home Minister, Pu Lalchamliana leh Excise Minister Dr.K.Beichhua ten an hmanpui a ni.
Khuallian Home Minister, Pu Lalchamliana chuan thu sawiin Excise & Narcotics Department a thawk tute chu mipui rawngbawltu an ni a, NDPS Act 1985 leh Mizoram Liquor (Prohibition) Act 2019 kalpui kawnga department pawimawh tak an ni tiin ram leh hnam hmangaihna rilru dik tak pu chunga thawk turin a fuih a. Mizoram Home Guards & Civil Defence (MRHG & CD) te chu venhim hna pawimawh tak thawk tute an ni a, sawrkar hmun pawimawh hrang hrang vengtu an nih bakah rikrum thil hrang hranga tangkai taka hna lo thawk thin tute an ni a, an chhuanawm hle a ni, a ti a. Ram leh hnam venghim a, nunna tam tak chhanhim turin mawhphurhna lian tak in nei tih hre reng ang che u tiin fuihna thu a sawi a ni.
Khualzahawm Excise Minister Dr. K.Beichhua chuan mahni hna taima leh rinawm taka thawktute hi mi ngaihsanawm an ni tiin ram leh hnam tan malsawmna ni turin kalkhawmte a fuih a ni.
Central Training Institute, Mizoram Home Guards and Civil Defence- a Basic Training Passing Out Parade neite hi 38th Batch Mizoram Home Guards & Civil Defence Recruit Volunteer-te (mipa - 36 leh hmeichhia - 3), an vaiin mi 39 leh Excise and Narcotics Constable leh wireless Operator 52 (mipa- 40 leh hmeichhia - 12) an ni a. Basic Training chhuak turte hi an zavaiin mi 91 (mipa 76 leh hmeichhia-15)- an ni.
Basic Training hi October Ni 29, 2018 ah tanin vawiin hian tha takin an zo ta a. An training chhung hian Drill, Physical Training (PT), weapon, field craft, battle craft and tactic, civil defence, map reading, Medical first responder (MFR) te leh a dangte an zir a ni.
Training-a tithate chu -
1. Best All rounder- No C/611 F.Ramdinthara, Excise & Narcotics
2. Best in Drill - No C/608 Lalrintluangi, Excise & Narcotics
3. Best in Discipline - Rc No/271 - F.Lalhmuakliana, MRHG&CD
4. Best in Turn Out - RC No/264 Jimmy Zothantluanga, MRHG&CD
5. Best Fire - RC No/265 F.Lalawmpuii, MRHG&CD
