Vawiin khan 4th Batch Aapda Mitra Training of Community Volunteers in Disaster Response, Mizoram Chapter “Chhiattawkte Thian” kar hnih awh State Training Centre, Tanhril a  neih chu Closing ceremony  hman a ni. Closing ceremony-ah hian DM&R Minister Pu Lalchamliana  chu khuallian niin, programme hi a hmanpui ani.

DM & R Minister Pu Lalchamliana chuan tunhnaia Mizote tawngkam hriat ngun pawl tak pakhat chu Disaster Management & Rehabilitation a ni a, khawvel hmun hrang hrang, India ram leh Mizoram hmun hrang hrangah te khuarel chhiatrupna (natural disaster) a lo thleng fo thin a; kangmei, leimin, tuilian, lirnghing leh chetsual palhna avang te in chhiatrupna tawng thei kan ni fo thin, a ti a. Mizoram bikah phei chuan fur laiin leimin leh tuilian vanga harsatna hrang hrang tawk thei kan ni tih hriain Sorkar pawh a inbuatsaih lawk thin a ni, a ti a. Minister chuan chhiatrupna a lo thlen reng renga pawimawh tak mai chu chhiatna dinhmun leh awmzia rang taka chhut fel vat te, nunna chhanhim theih te him leh rang taka chhanchhuah hna thawh vat leh hmun hima awmna ngaihtuah sak te, nunna chhan hman loh te pawh lakchhuah thuai thuai te hi a ni a ti a. Tun thlenga kan tawn tawh atanga han thlir hian kan Mizo tlawmngaihna avanga kan han chet chhuah zung zung piah lamah hian hetiang huna chet lak dan lo zir chhuak tawh State Disaster Response Force (SDRF) te leh training nei tha Adventure Club te thiamna pawh ataka hman tangkai a lo ni fo tawh a ni, tiin a sawi a.  Minister Pu Lalchamliana chuan Mizo te hi hnam tlawmngai, tanpui ngaite tanpui thin kan ni a, chhiatrupna leh chetsual palh a lo thlen changa tangkai em em leh hmahruaitu pawimawh tak chu YMA / Khawtlang hi an ni a, chhiatrupna a lo thlena Sorkar beng a thlena a chet chhuah chang pawh hian khawtlanga mi tlawmngaite hi a hmun thleng hmasa leh che hmasa (First Responders) an lo ni zel a ni, a ti bawk a. Minister chuan Sorkar tan pawh a thlamuan thlak a, Sorkar leh khawtlang tanrualna tha avang hian chhanchhuah leh chhawmdawl hna pawh rang tak leh sawt taka thawh a ni thin a, chhiatrupna thlenna hmunah te hian kawng hmang hriat tawk loh avang tein kan inpekna leh inhuamna phu tawkin kan thawh a sawt lo fo thin a, chuvangin hetianga DM &R Department hmalakna a kan tangkai leh zual theihna tura training buatsaih a ni hi lawmawm a ti a. Vawiina training chhuakte mai bakah mipui vantlang tan pawh hriatzauna te, inbuatsaih thiamna te, tih tur leh tih loh tur hriatnaah te nasa takin hma min sawn tir ang a, anni zarah nunna tamtak chhanhimin a awm theih a beisei thu a sawi a ni. DM & R Minister Pu Lalchamliana chuan Volunteer training chhuak thar te chu khawtlangin a mamawh huna che chhuak vat tur te, sorkar leh khawtlang hruaitute zai ngai thiam tur leh mipui nawlpui chet rem chan lohnaah te fimkhur leh thiam taka che a mi tamtak tana malsawmna  ni turin leh mawhphurhna lian tak an nei tih hre turin a chah a ni.

Training Closing ceremony hi Pu C Lalruaia, Jt. Director (Operation)DM&R in kai hruaiin, Pi Zoenmawii Disaster Management Coordinator in training technical report a pe a. Pu John L T Sanga, CEO Aizawl District Disaster Management Authority, Pu Lalhruaitluanga, Disaster sub-committee CYMA leh Pu H Lalramnghaka, Secretary Lamchhip Branch  YMA in training chhuakte aiawhin thu an sawi bawk ani.

Training ah hian YMA Branch 10 Chawlhhmun, Chawilung, Lamchhip,Hmuifang, Sailam, Sialsuk, Sialsuk South, Samlukhai, Thiak leh Zotlang atangte in YMA volunteers mi 54 in training an nei a, training chhuak tharte hian training an neih lai hian chhiatna chi hrang hrang lo thlenna tanpui ngai leh hliamte tan pui dan chi hrang hrang an zir a. Training hi 1st Bn NDRF, Mizoram College of Nursing(MCON) leh Sports and Youth Services Department atanga staff ten a in chhawk in training hi an pe thin a ni.