Information & Public Relations Minister Pu Lalruatkima chuan vawiin khan Treasury Square a Lianchhiari Run, Multi Facility Centre sakna tur, I & PR ram a tlawh a. Multi Facility Centre hi sak thuai a nih theih nan a sakna tur hmuna la awm Printing & Stationery Department chu a theih anga ranga an insawn chhuah theih dan tur a ruahmanpui.

Lianchhiari Run sakna tur hi NEC chuan ni 11.04.2017 khan pawmpuiin a hnu lawkah 1st instalment Rs. 100 lakhs a sanction a, State matching share pawh cheng nuai 11 Mizoram sawrkar a pe chhuak zui leh bawk a ni. A satu tur contractor thlan fel vek anih hnuah pawh a sakna tur hmun hi tihruah theih a nihloh avangin hna tan theih a ni lova, hetihlai hian I&PR Office building luahlai erawh chu nikum chawhma lam khan thiah a lo ni tawh a ni. Building plan anga sa tur chuan I&PR ram chhunga P&S Department luahlai in hi thiah tel a ngaih avangin vawiin ni thlengin hma lak theih a la ni talo a ni.

Printing & Stationery Department insawnna tur sawrkar-in a ruahman sak Secretariat Annexe-II chu Pu Ruatkima hian a tlawh nghal a. Khawl lian sawnna tur hmunhma puahchah mek leh transformer dahna tur siam mekte a en a, Transformer hi sawn vat anih theih nan Power & Electricity Deparetment hotute chu a be nghal a. P&S Department hotute pawh a theih anga chaka insuan chhuah nise tiin a hrilh bawk a ni.

Lianchhiari Run sak turah hian motor tamtak parking bakah Conference Hall te, Mini Theatre, Art Gallery, Editing facility te a awm dawn a, Mizoram tana building rotling tur  a ni dawn a ni.

Minister Pu Ruatkima hi I&PR Secretary Pu Sangdingliana, Director Pu David L.Thangliana bakah P&S hotute, Contractor te leh MJA ten an tawiawm a ni.