Tukin khan Chief Minister Office a Cabinet committee room ah Institute of Chartered Financial Analysts of India (ICFAI) University, Mizoram a harsatna tawh mek te chinfel dan tur ngaihtuahin Cabinet meeting neih a ni a, Pu Zoramthanga, Chief minister chuan he hun hi kaihruai a ni.

Cabinet meeting neih zawh hian Pu Lalnunmawia Chuaungo, Chief Secretary chuan thutharthehdarhtute kawmin,” ICFAI University Act te leh ICFAI University Mizoram in a harsatna a neih hrang hrangte zirchiang a rawtna siam turin committee a din a ni,” a ti a,”Chief Secretary Mizoram in he committee hi a kaihruai ang a, sawrkar aiawh te bakah, ICFAI University General headquarters a representative te bakah, ICFAI University Mizoram a thawk mek Teaching staff leh Non-teaching staff representative te pawh telin sawihona leh ngaihtuahna neih a ni anga, a rang thei ang ber a sawrkar a rawtna siam tur a tih a ni,” a ti bawk.