Vawiin khan CTI, Sesawng-ah 9th Batch Mizoram Excise & narcotics Constable leh 39th Batch MHRG & CD Volunteers ten passing out an nei a, he hun hi Home Minister Pu Lalchamliana leh Excise Minister Dr.K.Beichhua ten an hmanpui a ni.

Khuallian Home Minister Pu Lalchamliana chuan thu sawiin Excise & Narcotics Department-a thawktute chu mipui rawngbawltu a bikin zu leh ruihlo laka venghimtu an ni a, NDPS Act 1985 leh MLTP 2019 te kengkawh tura khaipa an nih thu leh ram leh hnam hmangaihna rilru dik tak pu chunga thawk turin a fuih. MRHG & CD Volunteer-te pawh venhim hna pawimawh tak thawktute an niin sorkar hmun pawimawh hrang hrang vengtu an ni a, heng bakah rikrum thil hrang hranga tangkai taka hna lo thawk thintute an nih avanga an chhuanawm hle a ni, a ti. Mahni inphata midangte tana rawngbawl tih nunpuitute an ni a, ram leh hnam venghimtu tur leh nunna tam tak chhanhim turin mawhphurhna lian tak an neih chu hre reng turin a fuih bawk .

Khual zahawm Excise Minister Dr.K.Beichhua pawhin thu sawiin mahni hna rinawm tak leh taima taka thawktute chu mi ngaihsanawm an ni a, damchhung tawite hman that a pawimawh a, ram leh hnam tana malsawmna ni turin a fuih bawk a ni.

CTI, Sesawng-a Basic Training hi 29th October, 2018-a tan niin vawiin ni 3rd May, 2019 hian tha taka zawhfel a ni ta a. Mizoram Home Guards& Civil Defence-a Basic Training Passing Out Parade neite hi 38th Batch an ni a, mipa 36 leh hmeichhia 3 an ni. Vawiina Passing Out-ah hian Mizoram Excise & Narcotics Constable leh Wireless Operator 52 an tel a, mipa 40 leh hmeichhia 12 an ni thung. Passing Out-a tel theite chu an vaiin 91 an ni a, mipa 76 leh hmeichhia 15 an ni.

Basic Training hi Commandant, CTI kaihhruaina in Centre Commander -1, Training Officer -1 leh Instructor – 14 ten an enkawl a ni.

Trainingna a lawman dawngtu te chu –

1. Best Allrounder – No C/611 F.Ramdinthara, Excise & Narcotics
2. Best in Drill – No C/608 Lalrintluangi, Excise & Narcotics
3. Best in Discipline – Rc No/271 – F.Lalhmuakliana, MRHG&CD
4. Best in Turn Out – RC No/264 Jimmy Zothantluanga, MRHG&CD
5. Best Fire – RC No/265 F.Lalawmpui, MRHG&CD