Association for Environmental Protection (ASEP)-in nungcha, thing leh mau humhalhna kawnga mipuite zirtirna tura hmalakna chi khat ‘Nature & Environment Photography Competition’ a buatsaih chu vawiin khan lawmman dawngtute hnenah I&PR Director Pu David L.Thangliana-in I&PR Auditorium, Aizawl-a inkhawm tawi neihah citation leh sumfai a hlan.

Lawmman semna inkhawm ASEP President Pu K.Zomuansanga kaihhruaiah Khuallian Pu David L.Thangliana chuan Mizoram tana an thahnemngaihna a fakawm hle a, nungcha leh ram leilung tan ‘missionary’ hna thawk in ni tiin ASEP hmalakna avanga Mizoramah  pawh environment humhalh kawngah nasa takin hmasawn a nih thu a sawi a. ASEP chuan kum engemawzat theihtawp chhuahin zokhaw lamahte pawh intirchhuakin nasa takin beihpui thlak thin mahse tunah pawh hian thingtlang lama zin nikhuaah silai/sairuhkherh ak hmuh tur an la tam thu sawiin I&PR Director chuan mipuite zinga ‘environmental awareness campaign’ tun aia chak leh awmze nei zawka thlak turin ASEP te chu I&PR Department bakah Mizoram Journalists’ Association leh Mizo Photographers’ Society te nen thawhhohna siam a, zau zawka hnathawh zel dan ngaihtuahho tha a tih thu a sawi bawk. I&PR Department officials leh staff te chuan engtiklai pawhin environment humhalh kawnga an theihtawp an chhuah thin a, tih ve thih an neih phawt chuan theihtawp an chhuahpui zel dawn tiin ASEP hruaitute leh member-te a hrilh. Khawvel pumah boruak, sik leh sa inthlak danglam chak lutuk (global warming) buaipui laia ramngaw, thing leh mau, nungcha tih chereu/ tih rem zawnga thil ti duh an la awm chu a pawi a tih thu leh thingphun uar a hlu telh telh dawn tih  Pu David L.Thangliana chuan a sawi a ni.

ASEP Nature Photo Competition-ah hian mi 36-in a vaiin thlalak 94 an thehlut a, chung zinga ti tha leh lawmman dawngtute chu :

1st Prize : Lalvohbika Hrahsel, W. Phaileng (Citation + Rs.5000)

2nd Prize : C.Lalbiakzama, Pawlrang (Citation + Rs.3000)

3rd Prize : C.Lalsiammawia, Lunglei (Citation + Rs.2000)

Consolation Prizes (Citation + Rs.1000) : Reuben Pachuau, Johnny Lalhruaitluanga, C.Lalchawiliana, V.Lalchhuanawma, Daniel Lalchhandama, Bawihi Fanai, Tlauliana Bualchhuak, Duhsaka Aslan Jongte, Hrangmama, Lalremruata, PC Chuaudinga, Lalrochhara, Ramthansiama Chawngthu leh Moses Lalhruaizela te an ni.

ASEP Photo Competition lawmman tana sumfai tum saktu Pu R.Lalnuntluanga, Mission Veng pawhin thu sawiin tun Competition-a thlalak thehluh zawng zawng dahkhawma ‘Photo Album’ a siam tir chu ASEP President kutah a hlan nghal a ni.