Vawiin chawhma dar 11:00 khan Serchhip DC Conference Hall-ah FOCUS- District Management Unit Serchhip District buatsaihin District Level Consultation Meeting neih a ni a, Pi Sangchhin Chinzah, Chairman, District Level Committee leh District Bawrhsap chuan khuallian niin a hmanpui.

Khuallian chuan sawrkarin scheme tha tak a buatsaih thin chu lawmawm a tih thu a sawi a,  scheme hrang hrang tha tak tak siam thin ni mahse a dawngtu an pawimawh ber a, rinawmna nena hna thawh anih loh chuan hlawhtlinna a awm thei lova, mithiam ten hna thawh dan tur an sawi anga tha taka hna thawh anih theih nan khawtlang hruaitu VCP te an pawimawh tak zet a ni, a ti bawk. Tuna sawrkar ruahmanna thar FOCUS hian loneitute an dinchhuahna mai bakah ram leilung luang ral tur ven hnate, sik leh sa inthlak danglam siam tha tura ruahmanna kalpui ani chu lawmawm a tih thu sawiin, a neitu dik tak rilru pu a, kan tu leh fate tana chenna tlaka ram siam tura rinawm taka hna thawk turin kalkhawmte a sawm a ni.

Pi Lalhmangaihzuali, Dy. Director, Project Management Unit, SCRAM Aizawl chuan FOCUS (Fostering Climate Resilient Upland Farming Sysytem) lo dinchhuah dan tlangpui sawiin, ni 25.1.2018 khan New Delhi ah he project atan hian inremsiamna lehkha ziah fel niin, kum 6 chhung kalpui anih tur thu a sawi a. He project hmalakna atan hian Rs. Vaibelchhe 537.272 ruahman niin, IFAD (International Fund for Agricultural Development) kaltlangin Loan Rs. Vaibelchhe 53 chu United Nations atanga hmuh niin, sawrkar laipui scheme dangte nena convergence a kalpui thin tum a nih thu a sawi bawk.  Tun dinhmunah District 4- Serchhip, Champhai, Kolasib leh Mamit ah te hmalak niin, khaw 272 a chhungkaw 64500 in an chhawr tangkai thei dawn a ni, a ti. He project hian lo neitute dinhmun chawikan mai piah lamah awmze nei zawka tlangram lo neih dan kalpui hi a tum pawimawh tak a ni a, kum thara ram thar zuan mai lova, neih nawn theih dan turte leh kan kalsan hnu ramte pawh neih leh thuai tlaka siam tura hmalak chu a tum pawimawh tak a ni a ti bawk. FOCUS hi Mizoram leh Nagaland ah chauh kalpui ala nih thu a sawi bawk. 

Pu C. Lalnithanga, District Project Manager, FOCUS Serchhip leh District Agriculture Officer, Serchhip chuan inlawmna thu a sawi a, Serchhip Districta hmalak dan tur ruahmanna an neihte sawiin, khaw 32 ah baseline survey an nei zo tawh a. Hmabak khuaah te pawh survey neih chhunzawm zel anih tur thu sawiin, kar leh mai atang hian khaw hrangah hna thawk tura an kal chhuah tan tur thu a sawi bawk. 

Vawiina Consultation Meeting-ah hian Line Department hrang hrang hotute bakah Village Council 51 a an President leh Secretary te an tel a, chawhnu lamah lamah hnathawh dan turte inzirtirna hun hman a ni bawk.