1344/2024-2025

Dated Aizawl, the 28th July, 2024: Nimin khan 9th NITI Aayog Governing Council chu Prime Minister Pu Narendra Modi kaihhruaiin New Delhi ah neih a ni a. He huna tel Chief Minister Pu Lalduhoma pawhin thusawiin Viksit Bharat 2047 Mizorama a hlawhtlin theihna tur thil pawimawh hrang hrang a thlen.

Chief Minister chuan, NITI Aayog in State Institution for Transformation of Mizoram atana tanpuina a pek avangin lawmthu a sawi a. 16th Finance Commission hnena Mizoram mamawh (proposal) an thehluh te chu Viksit Bharat 2047 a hlawhtlin theih nana thil pawimawh tak tak te an ni, a ti.

Mizoram hian state dangte aiin hmasawnna kan kalpui tlai bik a. Kan awmna a kil khawr avangin nitin nun man leh hmasawnna hnathawhna man pawh a sang bik. Nimahsela midangte hnunga kal reng ringawt erawh kan tum hauh lo. Sustainable Development Goals tihhlawhtlinna lama kan kal chak dan hian state dangte umpha tura kan tumruhzia a tilang a ni.

Tuna kan mamawh hmasa chu inkalpawhna kawng tha zawk leh tam zawk neih a ni a, Mizoram road density hi national avarage aiin a la hniam bik a ni. Zirna, hriselna, tui, power, faina leh administrative infrastructures indaihlohna pawh a la nasa. Tin, Mizoram mipui zatve aia tam hi khawpuia cheng kan ni a, khawpui fel fai leh leilung chhiatna laka him, state hmasawnna bulthut (growth centre) ni thei neih kan mamawh. Khawpui leh thingtlang mipuite lakluh inthlau lutuk tihbo nan te, hna thar tam zawk siam anih theih nan te Handholding Policy kan kalpui dawn a. Hemi atan hian central sawrkar hian special package-in min pui se kan duh hle, a ti.

India hmarchhak state te hian leilung awmdan vang te, infrastructure lama kan la hniam vang tein lndustry lian kan nei tlem a, sum hnar kan tlachham bik. A bika kan harsatna te kan lo hmachhawnna tur; zalen zawka kan hman theih tur Fund awm thei se, kan tangkaipui hle ang. Tin, 10% GBS hi Ministry tin hian inkaihhruaina mumal tak duang se, Central PSU te pawh hian an CSR Fund 10% vel tal hi hmarchhak state ah hmang thei se, tiin a rawtna te a thlen.

Chief Minister chuan, Viksit Bharat tihlawhtling turin remna leh muanna neih a tul hmasaa, Mizoram chu International border pahnih karcheh; a thenawm rama harsatna thleng te vanga chim buai reng a ni a. Security Related Expenditure kan dawn a rem ta chiah lo anih pawhin central sawrkar hian Peace dividend tal min ngaihtuahsak se kan duh a ni, a ti bawk.