1343/2024-2025

2024 Vawkhniahzawn thla ni 27: Young Mizo Association (YMA) Serkawn Branch hnuaia Education & Library Committee te'n Serkawn khaw chhunga zirlai ti ṭhate chawimawina hun an buatsaih chu vawiin khan Serkawn Sikulpui Hall-ah Lunglei High Powered Committee Vice Chairman, Lunglei North Bialtu MLA Pu V. Malsawmtluanga chuan Khuallian niin a hmanpui.

Khuallian Pu V. Malsawmtluanga chuan zirlai hlawhtlinna chang tharte leh an chhungte a lawmpui thu sawiin, an hma lam hun atan duhsakna a hlan a. Zirlai ti ṭhate chawimawina hun hmanna hmun Serkawn Sikulpui chu Zosapte'n an din leh mi hlawhtling tak tak lo zir chhuahna a nih avangin leh amah ngei pawhin a lo zir ve tawhna hmun a nih avangin a ngaihlu hle tih sawiin, Serkawn pa a nih ang leh Bialtu MLA a nih angin District Education Office lam nen ṭang kawpa model sikula din chhuak tura hma lak a tum thu a sawi a. Footballer ni tura a inbuatsaihnaah, "mi dang aiin ka mu tlem ang a, mi dang aiin ka thawk rim ang" tih rilru pu-a a beih vanga khelhpuite zinga inthazo ber leh mahni inthunun thei ber pawl a nih dan te, a zirlai leh a hnaa thawh rimna avanga hlawhtlinna a chan dan te chu zirlaite fuihna atan tar langin, Pathianin kan tana malsawmna a dah tawng baw turin thawh rim a ngai, a ti a. Zirlaite chu vawiina an hlawhtlinna hi pen sang khat pen tura an pen khatna chauh a ni tih hre tur leh an zirlaiah leh an thil tihna kawng tinrengah Pathiana innghat tlat tura chahin, Pathiana an innghah phawt chuan Pathianin an duhaisam aia ṭha a pe ang tih ring ngam turin a chah a ni.

He huna khual zahawm, Lunglei District Education Officer Pi K. Lalrintluangi chuan zirlai hlawhtlinna changte chu Mizoram zirna tiphuisuitu leh timawitu an nih thu sawiin, a lawmpui thu leh a chhuan thu a hrilh a. An hlawhtlinna kawng sialtu chhungkua leh zirtirtute, fuih phura ṭawngṭaipuitu khawtlang leh kohhran te avanga lawm nachang hre tur leh ram leh hnam tana an mawhphurhna hria a, hlen chhuah tum turin a chah a. An hma hunah hlawhtlinna nen an inkarah eng pawh awm se, huaisenna leh tum ruhna nen pal tlang tum turin zirlaite chu a fuih a ni.

He hun hi Serkawn Branch YMA Education & Library Committee Chairman Pu F. Lalhmangaihthanga'n kaihruaiin, Baptist Printing Press Manager Rev. Lalramngheta Chhangte chuan hunserh a hmang a. Serkawn khaw chhunga zirlai ti ṭha mi 23 hnenah chawimawina thuziak leh thilpek hlan niin, Branch YMA President Pu C. Lalmuanzova'n zirlaite fuihna thu a sawi bawk.

Serkawn khaw chhunga board exam-a zirlai hlawhtlinna chang, class-XII chin hnuai lamte chu YMA Day, June ni 15, 2024 khan chawimawina hlan an lo ni tawh a. Vawiin hian bachelor degree china zirlai hlawhtlinna chang mi 23 (mipa 7 leh hmeichhia 16) hnenah chawimawina hi hlan a ni a. An zinga mi 7 (mipa 1 leh hmeichhia 6) chu university level-a top rank holder an ni.