North East Zone Cultural Centre (NEZCC) leh Art & Culture Department bultuma nimin atanga neih tan Aizawl City College Cultural Meet 2009 chu vawiin khan hman zui a ni a. Vawiina Meet kharna inkhawm leh lawmman semna hun chu Art & Culture Minister in a hmanpui a, he hunah hian Champhai North bialtu MLA Pu T.T.Zothansanga chuan Khuallian a rawn tawiawm bawk a ni.

Khuallian Art & Culture Minister chuan thu sawiin ram leh hnam dinchhuahna tur chuan thangtharte rilruah hnam zerang (culture) tuh ngheh a ngai a ni, a ti. Thalai lehkhathiam ten culture an hriat a, an belhchian a, an nunpui phawt chuan Mizo hnam tan rohlu dik tak an ni thei ang tiin Pu Zoramsangliana chuan khawvel hnam dangten Mizo min hriatna tur chu kan hnamzia atang a ni, a ti bawk. Tun sorkar kum chhungin thalai thahnem takte tan Mizoram pawna zin theihna tur ruahmanna ‘Heritage Tour’ kalpui mek a nih thu tarlangin Minister chuan hetianga hnam dangte nena intlawhpawh chu Mizo hnamzia pholanna kawng tha tak a ni a; Mizo hnamzia up ral loh nan a tangkai a ni, a ti bawk. Zirlaite chu an hnama an chian a, Pathian tih chunga mahni neih ang mil zelin taima leh tumruh taka lehkha zir turin Minister chuan duhsakna a hlan a ni.

Aizawl khawpui college-te hnamlam intihsiaknaa lawmman dawngte chu :

CHERAW:        1).Pachhunga University College
            2).Govt. Aizawl College
            3).Govt. Hrangbana College

SARLAMKAI:    1).Govt. Aizawl College
            2).Govt. Hrangbana College
            3).Pachhunga University College

OVER-ALL:        1).Govt. Aizawl College
            2). Pachhunga University College
            3).Govt. Hrangbana College te an ni.

Vawiin Meet kharna inkhawm hi Art & Culture Jt. Director Pu Ngurbiaka’n a kaihruai a. Mizo zinga thuziak lama milar tak Padmashree Khawkungi pawhin Meet ni 2 chhunga neih hi a telpui a ni.