Vawin khan Pu R. Romawia, Art & Culture Minister chuan Sazaikawn, Lunglei a Multipurpose Cultural Complex cheng nuai 180 senga sak chu a hawng. Hawnna inkhawm hi Pi Thanhliri Pachuau, Secretary Art & Culture Department in kaihruaiin Pu H. Zothangliana, Parliamentary Secretary chu khualzahawm a ni.

Pu R. Romawia chuan thusawiin he building tha tak mai ministry of culture sum hmanga sak peih a ni ta hi a lawmawm hle a ni a ti a, India Sawrkar hi Art & Culture-ah a hausa hle a, chuvangin Mizoram pawh a ngaihthahlo a, North East ah hnam hrang hrang kan cheng a Demapur ah North East Cultural Zone hmunpui din a ni a. Hei hi kan chhawr tangkai hle a ni a ti. Raja Rammahor Ray Library kaltlangin Library hrang hrang a lehkhabu tha tak tak sem a ni a, Zoram in a kan mamawh ber chu rilru siam that hi a ni a, Kut tling lova sum lakluh te, thatchhiatna te hi bansanin rilru thianghlim pu chung a hmasawnna lam pan i tum theuh ang u a ti. Kutdawhna thinlung pu lovin mite tanpui tu nih i tum theuh zawk ang u a ti bawk. Faina leh hriselna kawngah tan kan lak a ngaih hle thu a sawi a, NLUP kan dawn te hi tihlawhtling in hmasawnpui nan i hmang theuh ang u a ti. Hnam ang a kan awm chhung chuan kan culture hian hma a sawn thei dawnlo a, chuvangin kan culture hi kan humhalh a ngaih thu a sawi. Lunglei hi reilote ah hmun pawimawh tak a ni dawn a, Akyab kaltlang leh Tlabung border trade tihchangtlun hun ah chuan sumdawnna hmunpui pawimawh tak a la ni dawn a ni a ti bawk. 

Khual zahawm Pu Zothangliana, Parliamentary Secretary pawhin thusawiin A&C Deptt. tan ni chhinchhiah tlak tak a ni a, Multipurpose Cultural Complex hi Mizoram ah pahnih kan nei a, Hetiang building sa tur hian Central sawrkar ah sual ve fe a ngaihthu a sawi a. Mipui vantlang leh rawngbawlna kawng atan hmang tangkai turin a duhthu a sawi. Lunglei hi Zoram ah mizo tawng thiamna hmun a ni a chumi in a  a kentel chu thu leh hla mai bakah Video lamah Zoram ti lar tu in ni a ti. A&C Deptt. hi Zoram leh rampawn thleng in min ti hmingthatu a ni a, hnam zia leh lam te pho chhuak tu a ni a, kut hnathawk tu ten leirem an rah ve theih nan NLUP sem a ni a, mi tam takin  dinchhuahpui nan an hmang mek a ni a ti bawk.

Pu Hmingthanzuala, Director A&C Deptt.  in technical report pein Multi Purpose Cultural Complex hi Central Sawrkar, Cultural Ministry atangin cheng nuai 180 seng a sak a ni a, he building bakah hian staff quarter type I-II leh Exhibition cum workshop building sak tel a  ni a ti.