Vawiin dar 1:00 khan A.H. & Veterinary Minister Pu N.K.Chakma Office Chamber-ah Minister hovin Vety Department Officers te’n meeting an nei a, he meeting-ah hian Vety Director leh Officers an kal thahnem hle.
He Meeting-ah hian Minister chuan a department enkawla thawkte chu chhungkua pakhata mi ang an nih avangin inpumkhatna leh thawh hona tha neih a ngaih pawimawh thu a sawi a. Officers te chu sorkar policy ngai pawimawha tihlawhtling tura sorkar zai ngai thiam turin a chah a ni. Mi thiam (technical mi) awm khawm tamna department a nih angin Mizoram leh Vety Department hmasawnna tura thu rawn pe zel turin a chah bawk. Mizo te hi sa ngaina kan nih avangin leh thingtlang kilkhawr ber thlenga kan mamawh a nih avangin saa intodelh a pawimawh a ni a ti bawk.

Bird Flu chungchang pawh Minister leh mi thiam rualte’n sawi hovin, tun dinhmunah chuan Mizoram kan la him a, mipui tan chi-aina tur leh hlauhthawn tur a awm lovah an ngai. Mipui tana harsatna thlen lo tur bera kal zel an tum thu an sawi bawk.

Department hotute’n an hmalak meknate Projector hmanga entirin an en ho va. Tunah hian Vety Doctor thawk lai 120 leh staff 740 an awm a ni. Post ruak hnawh khah thu-ah te, budget neih tlem thu-ah te leh kawng hrang hranga an harsatna thlente chu Minister hian a theih ang anga hmalakpui a tiam a ni.