No.82/2019-2020
Chief Minister’s Relief Fund hman dan tur ngaihtuahtu atana din Committee on Utilization of Chief Minister’s Relief Fund for COVID-19 chu an Chairman Pu Lalnunmawia Chuaungo, Chief Secretary hovin Chief Secretary’s Conference Hall, MINECO-ah vawiin khan an thukhawm a. A thawhkhatna atana CM Relief fund semchhuah dan tur an rel.
Meeting-ah hian CM Relief fund chu thuang thuma sem ni se an ti a. Mizoram khua leh veng tinah Village leh Local Level Task Force 889 din a ni a. Heng Task Force te tan hian sum fai cheng nuai 88.9 semchhuah a ni dawn a. Lawipu, Rangvamual leh Edenthara Basic Services to Urban Poor (BSUP) Complex a cheng chhungkaw 600 te chhawmdawl nan Local Level Task Force te kaltlangin cheng nuai 6 sem a ni ang. Home, rehabilitation centre, orphanage leh centre hrang hrangte Mizoram hmun hrang hranga 67 awm mekah hian tanpuina sumfai belhkawmin cheng nuai 23.65 pek chhuah a ni dawn bawk a. Heti hian CM Relief Fund on COVID-19 semchhuah hmasak ber tur chu a zavaiin cheng nuai 118.55 a ni. Committee on Utilization of Chief Minister’s Relief Fund for COVID-19 rawtna ang hian a rang thei ang berin sem chhuah a ni ang.
