No.7750/2020-2021

Aizawl, 10th March, 2021 : Tukin zing khan Sports Minister Pu Robert Romawia Royte chuan a chenna In, Chhinga Vengah a bial Aizawl East-II chhunga chhungkaw 150 te hnenah a tum thum nan Puanthui Khawl a sem.

Pu Robert Romawia chuan thu sawiin sum leh paiah chuan channa leh hlohna tur a ni tih hre reng chungin, bial mipuite leh ram leh hnam tan zau zawka rawngbawl turin politics ah a lut tih a sawi a. Theihtawp chhuah zel a tum tih pawh tarlangin nasa lehzuala mipui rawng a bawl zui zel theih nan amah tawiawm a, tawngtaipui thin turin kutkhawl dawngtute leh khawtlang hruaitu kal khawmte chu a ngen a ni.

Pu Robert Romawia chuan khawvelin Covid-19 Hripui nasa takin a tuar a, state dangte ang thovin Mizoram sorkar pawhin sum lamah harsatna nasa tak a tawk ve a ni, a ti a. Chutianga Mizoram sorkarin sum lama harsatna a tawh mek laia Central sorkar atanga hmasawnna sum tam tak a Department enkawl kaltlanga Mizoram tana a lo luang lut ve chu Zoram thalaite tana Pathian malsawmna a ni a ti a, dik tak leh tangkai taka hman a nih ngei a duh thu a sawi a. Puanthui khawl dawngtute chu an khawl dawnte tangkai taka hmang turin a chah a. A bikin chhungkuaa hmeichhia ten puanthui an thiam tul a tih thu sawiin, nu leh pate pawhin an tu leh fate chu mahni mamawh intodelh thei tura puanthui thiam tir tur leh an khawl dawnte hmang tangkai theuh turin a ngen a ni.

Aizawl East-II bialtu Pu Robert Romawia Royte hian a bial chhunga mamawhtute tan a MLA Fund atangin tum 3 kutkhawl a sem tawh a, tukin zinga a sem nen a vaiin puanthui khawl 570 zet a sem tawh a ni. 

Attachment

  • Loading attachment...