No.7751/2020-2021
Home department, Government of Mizoram chuan vawiin (10th March, 2021) khan Mizoram pawn atanga lom lut / haw turte tana hriattur pawimawh a hnuaia tarlan ang hian thupek an chhuah :
COVID-19 hrileng laka Mizoram mipui te an him theih nan Mizoram Sawrkar chuan mCOVID-19 mobile application leh website hmangin Mizorama lut zawng zawng te uluk takin a chhinchhiah thin a. India ram hmun hrang hranga COVID-19 case awm zat leh Health & Family Welfare Department in uluk taka entry point a medical screening / COVID-19 test a kalpui mek te thlir chungin khualzin te awlsam zawk nan Home Department chuan he mCOVID-19 mobile application leh website hi tlemin hetiang hian her danglam a ni.
Thlawhtheihna leh lirthei hmanga Mizorama rawn lut tur te chu mCOVID-19 mobile application / www.mcovid19.mizoram.gov.in website ah mPASS Flight emaw mPASS Road ah emaw an in register ang. Registration an tih fel veleh approval nghah ngai lovin mPASS ID an dawng nghal ang a, an pass an download/view thei nghal tawh ang. He mPASS ID hmang hian Mizoramah an lut thei ang. Thlawhtheihna a rawn lut te chu registration an tih fel hnuah chauh Lengpui Airport chhuahsan phalsak an ni ang.
Mizoram a lut tur, ILP Guidelines hman mek in ILP mamawh zinga a chhiar tel te chuan Lengpui Airport / Check gate / Mizoram House ah te Temporary ILP an la thei ang.
He ruahmanna thar hmang tur hian mCOVID-19 mobile application hmang tu tan Google playstore/ Apple App Store ah update dah thuai a ni ang a, hei hi an download phawt a ngai a, www.mcovid19.mizoram.gov.in website ah erawh a hman theih nghal ang. He ruahmanna ah hian mPASS Flight / mPASS Road tifel tawh sa te tan registration an tih nawn a ngai lovang.
Disaster Management & Rehabilitation Department in 22.01.2021 a Notification a tihchhuah tawh leh Health & Family Welfare Department in 28.01.2021 a Standard Operating Procedure a siam angin entry point ah Mizorama rawn lut tur ten medical screening/COVD-19 test an paltlang a la ngai a, India ram pawn atanga rawn haw te pawh quarantine an la ni ang.
