Vawiin khan District Election Officer, Aizawl District leh Social Welfare Department tang kawpin White Stone Conference Hall, Ramhlun Veng ah, a vawikhatna atan “EVM/VVPAT Awareness Programme For Blind Voters” a buatsaih a, Pi Josephine Zonunsangi, SDC, Aizawl in he hun hi kaihruaiin Mizoram Blind Society leh Samaritan Association for the Blind, Mizoram te an tel a, Social Welfare Department thawktu thahnem tak ten an telpui bawk.

Pi B Thangseii, Deputy Director, Social Welfare Department chuan kalkhawmte lawmna thu sawiin,” Mitdelte leh pianphunga harsatna nei ten kan duhthlanna kan hman ngei theihna turin Sawrkar in hma ala nasa hle a, khua leh tui tha kan nih theuh theih nan kan hma lawk a inthlan kan hmachhawn turah hian kan mawhphurna pawimawh tak, vote thlak hi i tum theuh ang u”, a ti a, Pi B Thangseii chuan, pianphunga rualbanlo leh mitdelten vote an thlak ve theih na turin Social Welfare department thawktute an pawimawh hle dawn avangin thahnemngaihna leh inpe tak chunga an hna te thawk turin a fuih bawk.

Pu Lalbuatsaiha, Icon, Person with Disabilities chuan, Mitdel leh rualbanloten awlsam zawka vote an thlak theihna tura DEO, Aizawl district leh Social welfare department hmalakna chu fakawm a tih thu a sawi a,” Mitdelten vote kan thlak ve theihna tura sawrkarin hma min lakpuina zawng zawnga lawmthu kan sawi ve theihna awmchhun chu Vote kan thlak ve hi a ni a, tun atangin vote thlak turin inpuahchah theuh ang u” a ti.

Vawiin Awareness programme ah hian EVM/VVPAT hmelhriatna leh hmanchhinna hun mitdelte tan neih a ni a, mitdel hawrawp (Braille) hmang a vote thlak dan te tihchhinna hun neih a ni bawk. Zaithiam zaite ngaihthlak niin zawhna leh chhanna hun tangkai tak siam a ni bawk a, Pi C Lalthuamluaii, District Programme Officer, ICDS Aizawl District in lawmthu sawina hun a hmang bawk.
 Vote thlak chungchangah PwD voter ten harsatna an tawh thin sutkian anih theih nan Polling Station-ah hengte hi chhawpchhuah tum a ni e.

1)Ramps(Kailawn)
2)Wheelchair.
3)AdjustableTable.
4) EVM (Mit thalo te tana khawih a hriathran theih tur chhut pawn (Braille  enabledEVM)
5)Booth Level Volunteers