Lungleiah a vawikhatna atan Art & Culture Department leh North East Zonal Cultural Centre (NEZCC), Dimapur te tangkawp buatsaihin ni 15 chhung awh (06/03/2019 atanga 20/03/2019) lemchan zirna ‘PRODUCTION ORIENTED THEATRE WORKSHOP’ neih a ni a. Vawiin ah he Workshop kharna Art & Culture Auditorium, Lungleiah neih niin Pi C.Lalremruati Lunglei DIPRO in a hmanpui.

Kharna inkhawm Pu Gen Khan Do, SRO Lunglei kaihhruaiah Pi C. Lalremruati chuan thu sawiin India rama lemchan zirna in tha ber National School of Drama (NSD) atanga train chhuak instructor ten Lunglei thalaite lemchan an rawn zirtir thei chu lawmawm a ti a. Trainees te chu an lehkha zir piah lamah extra-curricular activities te ngai pawimawh tel tur leh an eizawnna tur kawngah pawh tum mumal nei taka hma la chho turin a chah bawk.

Vawiin program-ah hian Pu RK Lalawmpuia, Training Co-ordinator in report a pein Trainer-te atangin thusawi ngaihthlak a ni a. Trainees te Certificate hlan theuh an nih bakah Drama hmuhnawm tak an entir bawk.

Production Oriented Theatre Workshop ah hian India Hnampa Mahatma Gandhi piancham pha phak vawi 150-na 2nd October, 2019-a lo thleng tur denchhenin  thupui atan ‘Life & Ideology of Gandhiji’ tih chu thlan a ni a. He Workshop-ah hian Lunglei khawpui leh a chhehvel atangin zirlai (trainees) mi 20 (mipa – 9 leh hmeichhia 11) an tel a. National School of Drama (NSD), New Delhi atanga zirchhuak Expert Instructor pahnih – George Zoremsiama Chhinga Veng leh Kevin Hnamte, Vaivakawn in an zirtir a ni.