2787/2025-2026 

Dated Aizawl, the 01st January, 2026 : Nimin khan Tourism Department chuan a vawikhatna atan Sakawrhmuituai tlang atanga kumhlui thlah paha nitla hnuhnung ber thlirhona hun ‘Sakawrhmuituai Sunset’ program chu an buatsaih a. He hun hi Tourism Minister Pu Lalnghinglova Hmar leh bialtu MLA Pu Lalthansanga, Environment Forest & Climate Change Minister ni bawk ten an hmanpui a.

Tourism Minister Pu Lalnghingova Hmar chuan ‘Sakawrhmuituai Sunset’ program hlawhtling taka buatsaih a nih theih nana Sihphir khawtlang hruaitute leh mipuite inpekna chu fakawm a tih thu sawiin an thawhhona avangin a lo beisei thin ‘community-based tourism’ chu a takah a hmuh theih thu a sawi a. Sakawrhmuituai tlang chu khawvel zau zawka tihlar tlaka mawi leh hmuhnawm a nih thu sawiin, he tlang atanga nitla mawi tak thlirhona hun hi Mizoram pawn atanga tourist tam zawk hip theihna a nih thu a sawi a. Great Wall of China tlawhtu tam ber chu Chinese an ni a, Taj Mahal tlawhtu tam ber pawh vai an nih angin kan rama hmun mawi leh nuam kan neihte hi a ram mipuiten kan ngaihhlut a ngai, a ti a. He program hi nakum lamah pawh changtlung zawka buatsaih zel tum a nih thu tarlangin, Sakawrhmuituai tlang hi mipuiin an hlut zuala, he tlang tlawhtu mikhualte atanga sum lengvak pawh Sihphir khawtlangin hlawkpui ber se a duh thu a sawi a ni.

Bialtu MLA Pu Lalthansanga pawhin thusawiin, Tourism Department leh Sihphir khawtlang hruaitute leh mipuite thawhhona zara hetiang program buatsaih a ni chu lawmawm a tih thu a sawi a. Kalkhawm mipuite chu dan bawhchhe zawnga che lova, hlim taka kumhlui thlahliam turin a chah a ni.

Tourism Minister hi Pi R. Lalrodingi, Director, Tourism Department bakah Department Official dang ten an tawiawm a. He hunah hian Mizo mipuite bakah Mizoram pawn atanga lo kal mikhual hmuh tur an tam hle a, tunlai zaithiam lar tak takten kumhlui thlah leh kum thar lo thleng tur lawmin mipui kalkhawmte zaiin an awi a, food stall leh carnival-te Sihphir khawtlangten an buatsaih bawk a. Security, medical leh traffic inrelbawl dan felfai taka ruahman a nih angin chhimtu kalkhawmten hlim takin hun an hmang a ni.