2768/2022-2023
Lunglei the 23rd November, 2022 – Vawiin khan Lunglei DC Conference Hall ah Lunglei District Aadhaar Monitoring Committee leh Unique Identity Authority of India (UIDAI) Regional Office, Guwahati hotuten Aadhaar chunganga hmalakna kal mek leh hmachhawpte sawihovin meeting an nei a ni.

Meeting-hi Lunglei District Aadhaar Monitoring Committee Chairman & DC Pu Kulothungan A in kahruaiin UIDAI Regional Office, Guwahati atangin Assistant Manager Pu Prasanna Saikia leh Private Secretary Pu Prabhakar Sarma te an tel a. Lunglei District-a Aadhaar enrolment dinhmun tlangpui leh hmalak tul te, thawktute fimkhur ngaihna lai te, document update campaign kalpui an tur te, nausen piang hlim leh kum upa zawk te inziaklut tura hmalak dan tur te chipchiar taka sawiho a ni.

UIDAI Regional Office, Guwahati Assistant Manager Pu Prasanna Saikia chuan powerpoint presentation a nei a. Mizoram pum projected population 2022 chu 12,27,000 niin Adhaar generate tawh zat chu 12,26,159 niin mihring za zelah 99.93 in Aadhaar nei tawhin Mizoram chu India hmarchhak state te zingah Aadhaar enrolment percentage sang ber a ni a. 0-5 years age group ah za zela 71 in Aadhaar card nei tawhin hmalak chak zawk nan Aadhaar Linked Birth Registration pawh Mizoramah kalpui thuai tum a ni. Undivided Lunglei District-ah Aadhaar enrolment 1,70,988 awm tawhin Aadhaar Enrolment Centre 17 (GAD hnuaiah 7, Indian Post Payments Bank hnuaiah 4, India Post hnuaiah 1, Women & Child Development Dept hnuaiah 4, State Bank of India hnuaiah 1) a awm mek a ni.

Lunglei District-a Aadhaar enrolment centre neih belh dan tur te leh document update campaign neih dan turte sawiho a ni.