Vawiin chawhnu khan Vanapa hall-ah ni 15 chhung awh " 15 Days Production Oriented Theatre Workshop" Ministry of Culture, Goverment of India hnuaia North East  Zone Cultural Centre, Dimapur leh Art & Culture Department, Mizoram Sawrkar te tangkawp buatsaih   kharna hun hman a ni a. Art & Culture Minister Pu R.Lalzirliana chuan khuallian niin he hun hi a hmanpui a ni.

Art & Culture Minister Pu R.Lalzirliana chuan hnam changkang zawk te apiangin an hnam thil te Lemchan kaltlanga puanchhuah an ngai hlu tih a sawi a. "Mizo te chuan tawngkaa inhlan chhawn thin, tlem a zawng siam rem deuh hnua Lemchan hmuhnawm tak taka siam tur, Thawnthu leh Hlathu te  kan ngah em em a. Lemchan ngaihhlut leh tih hmasawn kawngah hian hmasawnna lai tur ngah ber te zinga mi kan ni", a ti. A ti tak tak leh luchilhtu te tan chuan thil dang ang bawkin Lemchan chu eizawnna tlak a ni thei a. Lemchan huanga tui tam tak an awm mek  a, heng thalai rual te hian Mizoram pawna chhuah hreh lo se.  Hrehawm leh harsatna paltlang huama Phai lamah te pawh an thiamna te an tahhriam hriam chhoh zel pawh kan hmasawnna tur atan a pawimawh hle dawn a ni a ti.  Western culture in Mizo te lunglenna a hnem zo tak tak lo tih a sawi a. Mizo zai leh Hla - Tlar thum zai leh a dang te, Hnam lam leh Mizo Culture a bet thil pawimawh tak tak, a then te phei chu Thangtharte hriat tawh mang loh te  pawh thar thawh leh turin sawrkarin ruahmanna a siam chho zel dawn a ni a ti.

A&C leh NEZCC te tangkawp buatsaih  Theatre Workshop  kharna pual programme hi Dr.Lalzirmawia Chhangte, Secretary, Art & Culture chuan a kaihruai a. He hunah hian Eizawnna lam kawng hawi zawnga Lemchan zirna Hapta khat leh a chan ve chhung kalpui dan kimchang  takin ngaihthlak a ni . 15 Days Production Oriented Theatre Workshop hi July 10 khan Archive Hall, Babutlangah nitin zing dar 10 atanga tlai dar 5 thlengin zirlai 20 rualin an bei a. Hetih chhung hian lemchan lama hriat ngai leh thiam thil te zirtir an ni a. Lemchan rawn zir chhuak ta te chuan vawiin programme-ah  khan  Mizo Lemchan "Liandova Te Unau" chu hmuhnawm takin an rawn chang a ni.

Attachment

  • Loading attachment...