Vawiin khan Lunglei Additional DC Pu David Liansanglura Pachuau kaihhruaiin a office chamber-ah Mizoram Assembly ‘Election leh MP Election neih zawh taka pianphunga rualbanloten (PWD) awlsam zawka vote an thlak theihna tura ruahmanna siam te thlirletna leh hmalak tul te sawihona meeting neih a ni. Meeting-ah hian a kaihhnawih sawrkar official-te bakah tlawmngai pawl aiawhte an tel.

Meeting ah hian Lunglei Election Officer Pu J. Miahlung in report a pe a. Pianphunga rualbanlo te thleng phak inthlanna ‘Accessible Election’ neih hi ECI duh dan a nih thu sawiin India chu democracy a nih angin mipui aiawh tur thlannaah khua leh tui kum 18 chin chunglam, pianphunga rualbanlote leh kawng danga vanduaite pawh vote thlak vek turin ECI in a duh a ni, a ti. Lunglei District huamchhunga pianphunga rualbanlo (PWD) voter ten awlsam zawka vote an thlak theihna tura hmalakna tlangpui sawiin PWD voter list uluk taka buatsaih a nih thu te, polling station-ah PWD voter te pui tura YMA member tlawmngai (volunteer) 228 lai ruat an nih thu te, PWD voter te tana motor ruahman a nih thu te, DC leh official dangten PWD voter-te an in lama an tlawh thu te leh ECI in a duh dan anga ramp, wheelchair, signage, inthiarna te ruahman a nih thu a tarlang a. MP inthlan ah Lunglei District PWD voter za zela 56 (56%) ten vote an thlak thu a tarlang bawk. PWD voter te tanpui tura hun leh tha nasa tak sengtu tlawmngai pawlte a bik takin YMA te inpekna avangin an chungah lawmthu a sawi a ni.

Meeting-ah hian PWD voter te tana hmalak zel dan tur sawiho niin zirna in leh kohhran ah te hemi chungchang inzirtirna ‘Awareness Campaign’ te buatsaih thin ni se tih Committee chuan a rel a. Polling Station-a PWD voter te pui tur mi tlawmngai (volunteer) te tan pawh training mumal tak buatsaih chhunzawm zel ni se tih Committee chuan a rel bawk.