Aizawl City Bus Owners Association (ACBOA) General Assembly vawi 39-na vawiina Synod Conference Centre a neih chu Transport Minister Pu PC Zoram Sangliana’n hmanpuiin Mizorama lirthei chhiah lak dan ruahhmanna thar a sawifiah.
Minister chuan India ram State tam berah chuan Road Tax rate hi kum 10 danah ennawna tihsan thin a nih laiin Mizoramah chuan 1997, April thla a rate hman chu kum 15 hnuah ennawn ve chauh a ni a, Road Tax vawikhata pek (Life Time Tax) pawh hmang har ber te zinga mi kan ni, a ti a. February ni 13, 2012 a Transport Development Council Meeting chuan India ram State leh U.T tinah Life Time Tax hi in ang tlanga kumin chhung ngeia hman turin ruahmanna a siam a. He meeting thurel ang chuan Two wheeler leh Car, Company in a hralhna man atanga chhutin za zela paruk (6% of price of the vehicle) chhiah atana lak tur a ti a, chutihlaiin tun dinhmuna Mizoramin a hman mek chu 3.5% atanga 4% inkar chauh a ni zawk, a ti.
High Security Plate chungchang pawh sawilangin Minister chuan hma chak taka lak a nih mek thu leh tun dinhmunah Contractor pawh ruat fel tawh niin hun reilote chhunga hman tan a beisei thu a sawi a, Smart Card pawh hman thuai tum a ni, a ti bawk. Man tlawm zawka zin veivahna leh bungraw thiarna atan lui dung hman tangkai kawngah pawh chak taka hmalak mek a nih dan Pu Zoram Sangliana hian a sawi a, Bairabi leh Sairang inkar Tlawng dung atan sorkar laipui sum ruahman cheng vaibelchhe 5 hmuhfel a ni tawh nghe nghe a, thla hnih khat hnuah peihfel a nih a rin thu a sawi bawk.
Vawiina ACBOA Assembly thu ngaihtuah zingah hian sorkarin Road Tax a tihsan phuhruk nan City Bus ten chuan man tihsan ve an duh thu te, High Security Registration Plate chu City Bus ten hman ve kher ngailova an hriat chung chang te a tel a. Resolution “ACBOA General Assembly vawi 39-na chuan Central YMA in Insurance Company-a kan thil Claim te hmuh a awlsam phahna turin Mizoram-ah Divisional Office hawng ve tura hma an lakna chu kan thlawp tlat a, hemi bakah Oil pawlhdal chingte vanga kan lirtheiin a tuar nasat avanga Central YMA in hmalak a tum bawk chu lawmawm kan ti ani, heng hma an lakna kawngah hian a tul ang apianga puibawm turin kan in huam reng ani. Tin, khawpui chhunga kawngpui kama Lirthei Workshop awm te avanga Traffic Jam phah fo thin hi tihbo anih theih nan sorkar hian arang lamin hma la nghal rawh se” tih chu lungrual takin an passed.
Assembly hawnna inkhawm hi an President Pu Malsawmtluanga’n a kaihruai a, Transport Department Director Pu Lalthlamuana pawhin a telpui a ni. Vawiin Assembly-ah hian kum 2014 thlenga an hruaitu tur an thlang nghal bawk.
