Mizoram Governor chuan vawiin chawhma khan State Election Commission hnenah Mara Autonomous District Council (MADC) inthlan chungchanga mawhphurhna a hlan a. Hemi bawhzui hian vawiin chawhnu vek khan SEC chuan MADC inthlan chungchanga hriattirna an chhuah nghal a ni.

Pu C. Ropianga, IAS(Retd) State Election Commissioner (SEC) Mizoram chawnhnu dar 2:00 PM khan a pisa-ah media hmaah MADC inthlan dan tura ruahmanna(Schedule of Election) chu a puang a, Model Code of Conduct chu tun atang hian Saiha District-ah hman tan nghal a ni a ti. Pu Ropianga chuan media tel lova inthlan puan a hreh thu sawiin inthlanna thianghlim leh felfai neih a nih theih nan hemi lamah mipuite zirtirna pek pui turin a sawm nghal a ni.

Schedule of Election ang chuan vawiin khan MADC inthlan chungchanga hriattirna chhuah a ni a. MADC a seat chuh tum te chuan April ni 18 tlai dar 3:00 thleng hming an pe lut thei anga. Hming pek luh te hi hemi ni vek dar 3: 00 hnu lamah endik a ni nghal a nga. Candidate inhnukdawk leh duh te tan April ni 19 tlai dar 3:00 thleng hun hawn a ni ang. April ni 20 zing dar 10:00 leh chawhnu 1: 00 inkarah hian Candidate te hnena chhinchhiahna leh an hming list tarchhuah a ni a nga. Vote thlak ni tur chu May ni 3 (Ningani) zing dar 7:00 atanga tlai dar 5:00 thleng a ni ang. Vote thlak that a tul a nih chuan Vote thlak that ni atan May ni 4 ruat a ni. Vote hi May ni 7(Thawhtanni) zing dar 8:00 atangin chhiar tan a ni ang. MADC inthlanna hna pumpui chu May ni 9 ah zawhfel tur a ni ang. May ni 11 khian MADC thar meeting hmasa ber neih a ni a nga.Mara Autonomous District Council hnuaiah hian Constituency 25 leh Polling Stations 68 a awm a. April ni 10 a Electoral Registration Officers-ten Final Electoral Rolls an tih chhuah ang a vote nei thei awm zat chu 32,898 a ni. Saiha Deputy Commissioner chu District Election Officer (DEO)/Returning Officer (RO) atana ruat a ni a, amah puitu atan Asst. Returning Officer (ARO) pa 2 (pahnih) ruat an ni bawk. Heng bakah hian Polling Station tinah Presiding Officer-1 leh Polling Officer- 2 zel ruat an ni bawk ang.

The Mara Autonomous District Council (Constitution, Conduct of Business etc) Rules, 2002 as amended in 2011 angin, tun tum General Election-ah hian a vawikhatna atan Electronic Voting Machine hman a ni dawn a ni. Election Commission of India atangin EVM 100 hawh a ni ang a, Election Commission of India in inkaihhruaina dan a siamte chu felfai taka zawm a ni ang.