Vawiin chawhma dar 11:00 khan Serchhip DC’s meeting Room ah Serchhip Town Area Rates & Wages Control Committee chu thil pawimawh hrang hrang ngaihtuahin an thukhawm a tunhnaia Thing Mistiri Association in an nitin inhlawhna rate Rs. 500 a an in chhiar ringawt chung chang leh thil pawimawh thenkhat te ngaihtuah ho a ni.

Pu P. Lalchhuanga, Deputy Commissioner, Serchhip Town Area Rates & Wages Control Committee Chairman ni bawk chuan meeting hi a kaihruai a, member te an kal that avanga lawmthu sawiin Democracy ah chuan mipuite an lal ber a, eng pawl/association pawhin hma an lakin mipuite tan a tangkaiin a tha ber em tih an ngaihtuah zel tur a ni a, mipui nawlpui te hamthatna hi ngaih pawimawh ber tur anih thu leh an tana harsatna thlen thei tur anga hma lak a awm anih chuan Sawrkar, NGO te leh VC te nen tang tlanga tihtawp thin a tul thu a sawi a, an tan tlan phawt chuan kalphung tha hman chhunzawm zel tur a siam theih a ni tih a rin tlat thu a sawi bawk.

Committe chuan Serchhip Thing Mistiri Association ten anmahni thu a nikhat inhlawhna man (daily rate) Rs. 500 an inchhiar ringawt mai hi tuna tan chuan mipuiten an la zo dawn lo a hriat anih vangin an rate pangngai nikhata Rs. 400 hi an hmang leh tur a ni tiin a rel a, VC leh NGO hrang hrangten he thurel hi zawm anih theih nan an enzui nghal dawn a ni.

Committee chuan Serchhip Town Area huam chhunga Maximum Retail Price hman remchang ve lo Commercial Association hrang hrang (entirnan :- 407 Owners’ Association, Auto-Rickshaw Owners’ Association leh adangte) te hian an Rate bu April ni 30, 2012 hma ngeiin DeputyCommissioner hnenah an theh lut tur a ni tiin an rel a, Heng Pawl hrang hrangte Rate inchhiar dan zirchiang tur Sub-Committee ruat nghalin, member atan Serchhip Sub-Headquarters YMA President, District Consumers’ Association President, Serchhip District MJA President leh Serchhip Joint VC Charman te ruat an ni a, uluk taka zirchianna neih anih hnu ah rawtna an neihte Committee puiah thlenin ngaihtuah ho leh tur a ni ang. Hei bakah hian Serchhip District Transport Officer chu Committee member atana ruat belh a ni bawk.