Vawiin chawhnu khan Secretariat Conference Hall-ah Sawrkar laipui flagship programme Accessible India Campaign ( Sugamya Bharat Abhiyan) chungchang meeting neih a ni a. Accessible India Campaign hi Social Welfare Department-in Mizoramah chuan an kengkawh a. Meeting hi Social Welfare Department Secretary, Pu P. Lalchhuanga chuan a kaihruai a ni.
Accessible India Campaign ( Sugamya Bharat Abhiyan) hi December Ni 3, 2015 khan kalpui tan niin Campaign hian a tum ber chu pianphunga rualbanlo ten midangte ruala ke an pen ve theih nan leh awlsam zawka nun an hman theihna atana tan lak a ni a. He campaign ti hlawhtling tur hian kawng hrang hrangah ruahmanna siam niin hemi hian a huamte chu sawrkar leh mimal pisa awlsam zawka rualbanlo te’n an pan theihna tur te, lirthei (bus etc) harsatna nei lova an hman theih nan leh information and communication system an hman ve theihna tur te a ni a. Mizoramah chuan Accessible India Campaign hnuaiah SIPDA (Scheme for Implemetation of PWD Act 1995) thlunzawm a ni.
Meeting-ah hian Accessible India Campaign chu phase 3-ah then a ni tih tarlan niin phase I-na hi sawrkar building 37-a rualbanlo ten awlsam zawka an pan theihna atana building siamthatna tura tan lak a ni a. Hemi atan hian ruahmanna hrang hrang siam niin chungte chu lift, toilet, sloped ramp leh handrails (vawnban) siamte an ni. Heng thil hrang hrang sak dan tur inhrilhhriatna leh sawihona meeting-ah hian neih a ni.
Nikum khan sawrkar building 37-ah te hian empanelled firm, Sishu Sarothi (Guwahati) chuan accessibility audit an lo nei tawh a. Phase I atan vaibelchhe 6 chuang dah a ni a. Phase II hi sawrkar building 50 chuang siamthatna tura duan niin Phase III hi Aizawl, Lunglei, Champhai, Kolasib, Mamit, Siaha, Lawngtlai,Serchhip, Saitual, Khawzawl, Hnahthial-ah te kalpui tur a ni a. Accessible India Campaign atana hman theih turin sawrkar website 45 ruahman a ni bawk.
Meeting-ah hian Social Welfare Department, Taxation Department, Excise & Narcotics Department, Mizoram Board of School Education, Power & Electricity Department, PHE Department, Institute of Advance Study in Education (IASE), Government Mizo Higher Secondary School, Pachhunga University College, T. Romana College, Aizawl Civil Hospital, Science & Technology Department, Information & Public Relations Department, Horticulture Department, LAD, Transport Department, Land, Revenue & Settlement Department, Art & Culture Department, Tourism Department hotute an tel a ni.
