2312/2026-2027 

Dated Aizawl, September 23, 2026: Vawiin khan Accessible India Campaign kalpui mekah Audit team-te chuan Aizawl khawpui chhunga Biak In endikna an nei a, Commissioner, Persons with Disabilities Pi Vanlaldiki Sailo-in a ho a ni. 

Audit Team ten an endikte chu - Ramhlun North Presbyterian Kohhran; Baptist Church of Mizoram, Ramhlun North; St. Francis of Assisi Church, Durtlang; Leitan Presbyterian Kohhran; The Salvation Army, Durtlang Corps leh Durtlang Presbyterian Kohhran te a ni.

Pi Vanlaldiki Sailo chuan The Rights of Persons with Disabilities Act, 2016 in rualbanlote hamṭhatna tura a duan pakhat Access Audit (Accessible India Campaign/Sugamya Bharat Abhiyan) hi sawrkar laipui chuan a ngai pawimawh a, mi tinin vantlang hmunhma awlsam taka an luh leh chhuah theihna tura awlsamna remchang siam hi sawrkar duhdan a ni a, mi tin tih hian rualbanlote pawh a huam vek a ni, a ti. Inchhung leh pawn lama (indoor and outdoor) puipunna hrang hrang - biak in, school, office, damdawi in, vantlang veivahna (taxi, bus, adt.) leh hnathawhna hmunte hi mi tin tana awlsamna siam tur zingah a tel a, thupek khauh tak a tihchhuah avanga endik an nih thu a sawi a. Biak in sak meka siam ṭhat ngai lai awm ang angte chu kohhran hrang hrang hnenah ziaka pek leh vek tur a nih thu Commissioner, Persons with Disabilities hian sawiin rualbanlote tana hma an lo lak tawhna zawng zawngah lawmthu a sawi bawk.  

Mizoram State Commissioner, Persons with Disabilities office in Mizoram chhung district zawng zawng an tlawh chhuah vek tawh thu leh district administration kaihhruaina hnuaiah Access Audit hi anmahni huam chhungah ṭheuh chak taka an kalpui mek thu Pi Vanlaldiki Sailo hian a sawi bawk.

Vawiina fehchhuak audit team memberte chu Mizoram State Commissioner, Persons with Disabilities office-a thawktute bakah Aizawl Municipal Corporation Aizawl aiawh, Public Works Department aiawh leh Directorate of Information & Public Relations aiawhte an ni a. Kohhran mipui a duh apiangin an chhiar theih turin ‘The Rights of Persons with Disabilities Act, 2016’  Mizo ṭawnga lehlin chu an kalna kohhran hruaitute hnenah bu thum ṭheuh an hlan bawk.