2313/2026-2027

Dated Khawzawl, the 23rd September, 2026 : Vawiin khan Mizorama a vawikhatna atana Tourism Department leh Khawzawl DC Office tangkawp buatsaih ni thum awh tur Pluck and Pay Festival hawnna inkhawm chu Vanhnuailiana Hall, Tualte-ah neih a ni a, Tourism Department Minister Pu Lalnghinglova Hmar chuan khuallian niin hun a hmanpui.

Khuallian Pu Lalnghinglova Hmar chuan kan ram mawina te, kan boruak thianghlim te, kan thing leh mau te hi khualzin hiptu a nih thu sawiin, heng kan ram mawina leh hausakna phochhuak tura Pluck and Pay Festival buatsaih a ni hi lawmawm a tih thu a sawi a. Hman khat daih plastic tel lova he festival hman tum a ni chu fakawm a tih thu sawiin, festival dang la awm turah pawh plastic tel lova green festival hmang turin hma lak tum a nih thu a sawi a. He festival buatsaih kawnga Department hrang hrangte karah thawhhona convergence tha tak a awm chu lawmawm a tih thu a sawi bawk.

Khuallian chuan Festival-ah hian Mizoram pawna mi khualzin lo kal se kan tih rualin, Mizoram chhunga chengte hian kan rama hmun mawi leh pawimawh te kan ngaihsana kan ngaihhlut hmasak a ngai, a ti a. Kan ram chhunga chengte hi kan intlawhpawha, kan ram mawina thehdarhtu ambassador kan ni theuh thei tih a sawi a. Chawngtlai leh Tualte mipuite inpekna leh thawhrimna avangin lawmthu sawiin, festival hlawhtling tak nei turin duhsakna a hlan a ni.

Khawzawl Deputy Commissioner Pu K. Vanlalthiana, Organising Committee Chairman ni bawk chuan inlawmna thu sawiin, Tualte leh Chawngtlai khuaa Pluck and Pay Festival kan nei thei hi Khawzawl District tan hmasawnna ropui tak a ni, a ti a. He festival buatsaihna kawnga thawktu department te leh a khaw neitu Village Council te chungah lawmthu a sawi a. Ni thum chhung hian kuthnathawktute thawhrimna hriatpuia, an thlai leh thei tharte leia, hlim taka festival hmang turin kalkhawmte a sawm.

Khawzawl Addl. DC Pu K. Zorammuana, Organising Committee Co-Chairman ni bawk chuan Festival report a pe a. Mipuite tlawh theih turin Chawngtlai-ah kiwi huan 3, sapthei huan 5 leh tomato huan 5 thlan chhuah niin, Tualte-ah sapthei huan 2, fanghma huan 5, tomato huan 5 leh bean huan 2 thlan chhuah a nih thu a sawi a. District Agriculture Office leh District Horticulture Office, Khawzawl te pawhin an hmalakna hrang hrangte leh an thlai tharte phochhuahna hun an hman tur thu leh Block Mission Management Unit, Mizoram State Rural Livelihoods Mission (MzSRLM), Khawzawl RD Block leh NABARD te tangho-in Block Mela buatsaih a nih thu a sawi bawk.

Pu C. Zosangliana, Addl. Director, Horticulture Department chuan Tualte leh Chawngtlai khuaa thei leh thlai chin kawnga Department hmalaknate a sawi a. Tualte khuaah hian kum 2019 atang khan Horticulture Department-in tomato ching turin hma a la tan a, chhungkaw 200 chuangin eizawnna atan hmangin, tun thleng hian quintal nuai 10 chuang an thar tawh bakah Rs. Nuai 1400 chuang zet an lakluh tawh thu a sawi a. Tualte khuaah vek hian kum 2025-2026 chhungin MIDH Scheme hnuaiah chhungkua 151-te chu sapthei ching tura thlan niin, hma lak chhoh mek a ni tih a sawi bawk.

Chawngtlai khuaah hian kum 1995 vel daih atang tawh khan chhungkaw 10-in sapthei an lo ching tan tawh a. A karah harsatna tawk mahse tan la thar lehin, a chingtu an pung zel a, sapthei chinna atana an mamawh tur bungrua (material component) hrang hrang pek an ni a. Chawngtlai khuaah vek hian kum 2020 vel atang khan mumal taka tomato chin tan niin, tunah chuan chhungkaw 120 chuang zetin eizawnnan an hmang mek a. Tun thleng hian tomato quintal 8000 chuang hralh tawhin cheng nuai 400 chuang zet an lalut tawh bawk a ni. Tun dinhmunah Mizorama tomato thar chhuak hnem pawl niin khaw tamtak tan entawntlak khawpin hna an thawk nasa hle a ni.

Festival hawnna inkhawm hi Pu Lalchhanchhuaha, Village Council President, Tualte chuan a kaihruai a. Pi Lalthakimi Pachuau, Joint Director, Tourism Department chuan lawmthu sawiin inkhawm hi a khar.

Pluck and Pay Festival hi September 23 – 25, 2026 chhung Chawngtlai leh Tualte khuaah neih tur a ni a. Festival chhimtu mipuiten a thlengtu khuaa loneitute huanah kalin thei leh thlai rah chi hrang hrang lovin, an lei thei dawn a. Chawngtlai field-ah kuthnathawktute thar chhuah leh siam chhuah zawrhna stall engemawzat a awm a, Zawlkhaw Adventure Club-ten zipline hmanga uai theihna an buatsaih bawk a. Chawngtlai Historical Society leh Tualte Vanglai Committee-te kaihhruaiin historical leh tourist site hrang hrang, Pathian tlang te, Nikuala Lungdawh te, Zo Hill Station te, pasalthate in hmun te leh hmun pawimawh dangte a tlawh theih a. Heng bakah hian mipuite intihhlimna tur Mizo infiamna hrang hrang buatsaih a ni bawk a. Zaithiam lar tak takte hovin tlaiah concert buatsaih a ni bawk.