2314/2026-2027

Lawngtlai, 23rd September 2026: Vawiin khan Environment, Forest & Climate Change (EF&CC) hnuaia Special Investigation Team (SIT) Lawngtlai te chuan an Chairman leh Bawrhsap nibawk Pu Donny Lalruatsanga kaihhruaiin a Office Chamber-ah thutkhawm an nei.

Pu Donny Lalruatsanga chuan kalkhawmte chibai bukin 'Riverine Reserved Forest' leh Reserved Forest Areas- te venhim leh enkawl kawngah Special Investigation Team - ten theihtawp an chhuah mek a ni, a ti a. Bawrhsap chuan thahnemngai taka Riverine Reserved Forest leh Reserved Forest Areas- te humhalh a nih tur thu sawiin, LADC, CADC leh Lawngtlai mipuite thawhpuiah a sawm nghal bawk.

Thutkhawmah hian LADC leh CADC - in Land pass an lo pekchhuah tawh Category A- Prior to 1980 ( Enforcement of Forest Conservation Act); Category B- Between 1980- 2005 ( Enactment of Forest Right Act 2005); Category C- Between 2005- 2010 leh Category D- Post 2011, ah te fel fai taka thliar hran tura rel tawh chu ennawn a ni a. Supreme court thuchhuakin Riverine Reserved Forest Areas- chhunga Land pass awmte sawnchhuah emaw Forest Department hnena ram awl emaw ram ruak pek (Compensate) tura a tih chu ngun taka ngaihtuah a ni a. The Mizoram Forest Act 1955 - in 6th Schedule Area - a huam leh huam loh hi zirchian phawt ni se, khua sawn chhuah emaw Forest Department - hnena ram pek ngai a awm thulhah LADC leh CADC Revenue Department - ten ramruak lo zawng lawk se an ti bawk a ni.

Vawiin thutkhawmah hian SDO (S), LADC leh CADC - a Sr. Revenue - Settlement Officer, Sr. ACF (LADC);  FRO (CADC) leh DCF (Wildlife) aiawhte an tel thei a, Pu Donny Lalruatsanga chuan lawmthu sawiin hun a khar.