Lunglei District huamchhunga political party/candidate-te inthlan senso vil tur Accounting Team-te chuan vawiin khan training chhawng 3-na an nei a, 35(ST)-West Tuipui RO Pu Donny Lalruatsanga’n training hi a kaihruai a ni.

Accounting Team-in candidate tin pualin Shadow Observation Register an vawng ang a, SOR-ah hian senso thlithlaitu Team leh report hrang hrang atanga hriat dan election sensote chu an chhinchhiah ang. He Register-in a tum chu Candidate-ten senso tam tham an neih leh an report-te lo endik a ni. Accounting team-in VST, VVT, MCMC, SST, FS leh Complaint Monitoring Control Room atang tein ni tinin report an dawng ang a. Accounting Team hian EO leh AEO te kaihhruaina hnuaiah hna an thawk ang. AEO-in SOR-te hi ni tinin a enfiah ang a, Team hrang hrangte senso report te chu kim taka ziah luh a nih dan a chian thin ang. Thil inmil lo leh inthlahdah deuhna a awm chuan EO hnenah a report nghal zel ang.

Accounting Team-in SOR rual hian Evidence Folder an vawng tel ang a. SOR-a sum senso awm nia ziah zawng zawng finfiahna (evidence) chu he Folder-ah hian vawn tlat tur a ni a. SOR record nen a inmil leh mil lo tih a endik tur a ni. Candidate-in dan khap thil atan sum senso a nei tih hriatchhuah a nih chuan chutiang dan hnuaiah chuan Candidate lakah action lak tur a ni. Candidate-in Voter-te hip nan pawisa emaw bungrua emaw a sem tih hriat a nih chuan Police emaw a rel theitu Court hnenah IPC-a inthamna chungchang dan hnuaiah chu mi ni vek chuan complaint theh luh tur a ni. Hei bakah hian, chuta tana sensote leh FIR thehluh chungchang chipchiar chu SOR-ah chhinchhiah tur a ni bawk. Darkar 24 chhungin Commission hnenah thilthleng chanchin chu report tur a ni.

Accounting Team ten an vawn Shadow Observation Register (SOR) hi Candidate emaw a aiawhtu emaw mi dang emaw tan Candidate expenditure register endik lai chauhvin a en theih ang a, a hmaa lo en phal a ni lo. Candidate expenditure register-a sum hmanral tarlan chu SOR-a chhinchhiah aia a tlêm chuan register endik lai hian chu register-ah chuan EO-in hming sign-in, Candidate chu hriattir tur a ni a, chu chu SOR-ah thai langin Candidate/a aiawhtu hming sign lâk bawk tur a ni. Candidate/ Election Agent hnenah thil inmil lo chungchang chu lehkha ziakin RO-in chu mi ni vek chuan Notice pe-in a hriattir ang a. Chu Notice copy chu vantlang hriat atan RO Notice Board-ah tar chhuah tur a ni. Vantlang zinga mi tupawhin a duh chuan Notice copy hi Re. 1/- per page chawiin in a nei thei bawk ang. He notice copy leh Candidate-in a lo chhânna copy chu Evidence Folder-ah vawn a ni ang a, SOR-ah ziah lan bawk tur a ni. Notice chhânna copy hi RO Notice Board-ah tar a ni ang a, a copy chu Re. 1/- per page chawiin vantlangin an nei thei bawk ang. Notice leh a chhânna copy te hi District EMC, EO, DEO leh Dy. DEO te hnenah, Result puan hnua Candidate-in a theh luh Expenditure Account dik famkim dan enna atan pek bawk tur a ni. Heng chungchangah hian Commission thuchhuak thar ber berte zawm zel tur a ni.