Food, Civil Supplies and Consumer Affairs Department chuan Chi chungchanga thuthang awmah a hnuai a mi ang hian thuchhuah asiam.
Tukin November ni 15 a thuthang enge maw avanga Chi (Salt) man san thut chungchangah enfiah turin Food, Civil Supplies and Consumer Affairs Department chuan chhuichiang tur Team siamin Aizawl veng hrang hranga Chi chheprel (Hoarding) leh a man to a hralh an awm leh awm loh endik tur a tir chhuak nghal a ni.
Silchar DRC hnen atanga thudawn dan in Chi harsat thut (scarcity) tur thuthang hi Silchar-ah chuan nizan November ni 14 khan a darh tawh a ni, a ti.
Shillong ARC-in tukina report a pekah chuan Meghalaya sawrkar chuan Chi harsatna hi an hre lova, Shillong-ah pawh Mizo te chu a buaipui hmasatu an ni a, mahse he thuthang hi a darh chho ve mek a ni, a ti.
Kolkatta JRC hnen atanga zing dar 11:00-a report dawnah chuan Chi harsatna hi an la hre lova, mahse zawi muangin thuthang hi a darh ve zel avangin, dar 12:30 p.m vel atang chuan Chi lei tur a vang ve tan deuh tawh ni a thu dawn a ni.
Guwahati DRC hnen atanga thudawn dan in hetiang thawm ri hi Guwahati-ah pawh a awm a ni, a ti.
Bihar-a district 4 ah mi tute emaw in thudiklo an thehdarh avangin Chi a vang dawn nia sawi a ni a, amaherawhchu Chi a vang lova, a man pawh a pangngai reng a ni.
Tukin zinga hetiang thuthang a awm avang hian dawr lian thenkhat chuan zingkarah Chi 100 quintals hralh hman te pawh an awm a, whole-sale dealer-te pawh in hetiang thuthang darh tur hi an hriat lawk bik loh thu an sawi.
Chi chheprelh leh man to a hralh veng tur leh dap chhuakturinFlying-squad leh Supply team-te Aizawl veng hrang hrangah tirh chhuah nghal an ni a, an ni hian an fang kual reng a ni. Heng bakah hian Static-squad, Mizoram atanga Chi phurh chhuah tum an lo awm palh a veng turin, Sairang road-ah leh Durtlang road-ah te duty tir an ni a, Kolasib-ah Police duty tir an ni bakah, Mizoram atanga chhuak tur motor lo check vek turin Supply Check-gate, Vairengte hriattir an ni bawk.
Hetiang thuthang a awm avang hian mipui ten mamawh bak aia tam chi lei lo hram turin sawrkar chuan mipui te a ngen a. Chheprelh (Hoarding) leh man to a hralh hi Essential Commodities Act, 1955 dan bawhchhiatna a ni a, chutiang ang ti hmuhchhuah an nih chuan an chungah dan anga action lak a ni ang.
