Vawiin chawhma dar 11:00 khan Aizawl City Local Council Association (ACLCA) chuan a vawi khatna atan Vanapa Hall-ah General Assembly an nei a; UD&PA Minister Pu Zodintluanga chuan a hmanpui a ni.

Pu Zodintluanga chuan, “ Aizawl khawpui thang zel vil turin Aizawl Municipal Council (AMC) chu din a lo ni ta a; he AMC kutke ber leh tungdingtu  tur chu Local Council-te hi in ni” a ti. Local Council huam chhunga khawtlang hmasawnna hna chi hrang hrang thawh thinte chu uluk tak leh fir taka lo vil thin tura member-te chahin, Minister chuan, “In area- chhungah party mi leh mi dang tupawhin sawrkar ruahmanna hnuaiah hna an rawn thawk a nih chuan Local Council-ten an thawh lain uluk takin lo vil ula, chhe taka hna an thawh zawh tawh hnua sawisel leh si ai chuan nasa takin kori a tu zawk dawn a ni. Local Council-te mit tlung lova hnathawkte chu ka hnenah rawn thlen ula, ka hovin a tul angin action kan la ang a, an bill thlengin a tuar mai tur a ni.” a ti. Pu Zodintluanga chuan Aizawl khawpui Veng hrang hranga bawlhhlawh senghawi hna Local Council-in an kenkawh achinah khawpui a fai thu sawiin, “Tun anga kan tan mar reng chuan Aizawl khawpui hian hun reiloteah faina kawngah hmar-chhak khawpuite zingah hming a chher thuai ang tih a rinawm a. Veng hmasawnna leh thianghlimna inbelh khawm hian khawpui leh mipui changkang a siam dawn a ni tih hriain keimahni area theuhah thahnemngai lehzualin sawrkar leh mipuite nen I thawk tlang zel ang u” a ti bawk.

Aizawl khawpui chei hna hi UD&PA Department hnuaia SIPMIU kal tlanga thawh mek a ni a; miretheite chenna turin Chite, Lawipu, Rangvamual leh Durtlang-ah te In sak mek a ni a; hetiang bawk hian District khawpui hrang hrangah pawh miretheite chenna tur sak a ni bawk. Aizawl-ah tuizem lian 7 siamthat a ni a; mipuite hman tur tui metre tha chi 13000 lei a ni tawh a, tui tihthianghlimna pawh Tuikhuahtlang leh Chanmari-ah bun fel a ni tawh bawk. Hengte bakah hian khawpui bawlhhlawh leh tuichhia khawnkhawmna tur leh sawngbawlna tur pawh a ruangam tur ruahman fel a ni tawh bawk a ni.

Aizawl-ah Municipal Council a lo din tak avangin khawpui huam chhunga Village Council/Court ni thinte chu 26.6.2010 atang khan Local Council tia hming thar vuah a lo ni ta a. Aizawl City Local Council Association pawh hi 7.6.2011 khan din a lo ni zui ve ta a; Local Council 78 an awm a ni. Vawiina ACLCA khawmpui hi an President Pu  V.L. Lawma chuan a kaihruai a; an pawl Dan Bu duan thar chu khawmpui hian a nemnghet nghal a ni.