Hmingmawii Industry Registration cancel tura ngenna MNYF leh MPCY ten Industries Director hnena an thehluh chungchangah, Director of Industries chuan MNYF leh MPCY General Secretary te ve ve hnenah lehkha thawnin a hnuaia mi ang hian a hrilhfiah :

1.    Tailoring Unit te hi Industries Department te dan hman lai hnuaiah chuan industry lem an ni lova, an hnathawh a zirin service sector emaw manufacturing sector ah emaw dah theih an ni. Puanthuiin an mahnia puanthan te leia, chung hmanga thil chi hrang hrang an siam chhuah chuan manufacturing unit an ni tih a hrilh a. Mahni raw material pawh nei lem lova, mi in an thui tir man chauh la te chu service sector an ni a; M/S Hmingmawii Industry hi chuan material mamawh la lutin, readymade finished product ah an lo siam hian Industrial Classification ah chuan Manufacturing Unit ah dah an ni a ti a.

2.    Heng party pahnih thalaiten Supreme Court thuchhuak an rawn tarlan chu Central Excise Act, 1944 anih thu tarlangin, Industrial registration hi Micro, Small & Medium Enterprise Development Act (MSMED Act), 2006 hnuaia tih a ni a ti a.Hemi dan hnuaiah hian industrial enterprise chu service enterprise leh manufacturing enterprise ah then phawkin, industrial enterprise ten raw material siam danglama a hlutna lo belhchhaha thil an siam hian manufacturing enterprise anga ngaih an ni a ti a, service charge ringawt hmanga ei an zawn chuan service enterprise an ni a ti.

3.    Director chuan manufacturing activity tih hrim hrim hi Central Act hrang hrangah hrilhfiah dan leh a huam chin a inan loh theih thu hrilhin, Supreme Court thuchhuak tlawh chhana registration cancel tura an ngenna chu thil hriatchian tawk loh vang nia a hriat thu a hrilh a.Case Law tan chhana an tarlante pawh kan thu nen a inhman pawlh chi loh a ni a ti.

4.    Thu bulbal tak hre tura department thil tih dan leh dan tlawhchhan te hrechiang hmasa lova, department te dan bawhchhia anga thu thehdarh chu fello hle a a hriat thu Director of Industries chuan a lehkha ah hian a tarlang bawk a ni.