Vawiin khan Parliamentary Secretary to Chief Minister Pu Lal Thanzara’n TNT, Muanna Venga-ah Mizoram Ad Hoc Adided Middle School Teachers Association (MAAMSTA) General Assembly vawi 3-na a hman pui.

Pu Lal Thanzara chuan ram leh hnam tan zirtirtute pawimawhzia sawiin ei leh bara intodelh te, hmasawnna ruh rel ropui tak tak din te hi thiamna leh zirna tel lo chuan hmasawnna kebai a ni, a ti. Zirtirtu kalkhawmte chu tihpalh thil thu a zirtirtu hna thawk an ni lova, Pathianin an rawngbawlna tura a dahna hmun a ni tih pawm turin a fuih a. Zirlai bu chhung chauh zirtir ringawt piahlamah mi puitling, khua leh tui tha chher chhuak tura tan la chhunzawm zel turin a sawm a ni. Parliamentary Secretary chuan ram hausa leh changkang apiangah hna tling a ngaih a tam a, ram rethei leh hnufual apiangah a tlem thung tih sawiin Zofate’n kan thawh duhloh leh thawh hreh hna thawk tura lo lut State pawn a mi ten kan chanpual tam tak an eiral a ni, a ti a. Ram changkang zawka an thawh hrehloh, Mizorama hna hnuai hnung anga kan ngaih thin chawisan leh thawh nachang kan hriat a tul a ni, a ti. Pu Lal Thanzara chuan hlawh ni lovin hnathawh a hlim leh lungawi mi te hian Pathian remruat an rap dik a ni tiin sum hmu tur ringawta hnathawk te chuan hlimna aiin phun nawina an hmu tam zawk a, nun hlutna tak tak dai pha turin kan hnathawh theuhah hian i lungawi ang u, a ti.

Conference hi MAAMSTA President Pu C Lalthantluanga’n a kaihhruai a, an Secretary Pu Lalmuanchhunga’n an pawl hmalak dan tlangpui a report a. Chawhnu lamah rorel inkhawm leh hruaitu thar thlanna hun an hmang ang.