Chief Minister Pu Lal Thanhawla chuan Aizawl Development Authority hi duhsak bik nei lovin huaisen takin kal chho zel rawh u, a ti. He thu hi vawiina a Office Conference Hall-a Aizawl Development Authority Meeting vawi 9-na an neiha a sawi a ni.

ADA Building Regulations anga hmalaknaah kumin May ni 14 thleng khan In Sak dilna 1963 lut ah, 1669 (86.5%) phalsak a ni a, ngaihtuah lai mek  153 (7.8%) leh hnawl sak 65 a awm bawkin, dilna lakkir zat 49 a awm bawk a ni. Sak chhunzawmlo tura hriattirte 55 zingah 9 te chu thiat tura tih an ni a. Chief Minister chuan diktak leh huaisen taka kal zel turin a fuih a ni.

Meeting a agenda an chhawpchhuahte chu pawm vek a ni a. Chung zingah chuan ADA Legal Adviser atan ni lai chu kum khat dang atan thawk chhunzawm tura remtih a ni a.Thawktu indaih lohna avangin hna thar Public Relations Officer post-1, JE-3, Planning Assistant-3,  Junior Assistants- 3 leh Peon-1 lak remtih a ni a. ADA a Planning Cell din nise tih chu kum 1 chhung enchhin phawt nise, Chaltlang leh  Chanmari inkar leh Bawngkawn leh Durtlang inkarah in kawng level aia sanga sak phal loh tih chu pawmpuiin, hei hi Aizawl Master Plan a telh tura tih a ni. ADA huam chin tur ram hi ADA  Act 2005 in alo sawi tawh chu pawm a ni bawk a, Building Regulations 2008 siam that duhna pawh pawm a ni.