Vawiin chawhma dar 11 khan The Aizawl Development Authority chu Chairman leh Chief Minister Pu Lal Thanhawla hovin C.M.Conference Hall-ah Meeting vawi 11-na an nei a, insak chungchanga mipui ten harsatna an tawh chi hrang hrangte sutkian nan leh  an awlsam zawk nan dan dinglai ADA Building Regulations, 2008 siamthat dan turte an rel ho a ni.

An thu ngaihtuah zingah insak phalna dilnaa thiltel tur Drawing siam chungchangah Drawing ngai lova ruahmanna siam te, insa turte tana hmun awl zuah tur chungchangah inhmun te leh rualrem lo laia sa tur te tan hmun zuah tur tih tet te, insak san zawng chhawng 4 (42 feet) chin bituk mek chu chhawng 6 (feet 64)-a tihsan te, floor khat pumpui motor dahna (garage) atana siam a nih dawn chuan chhawng 7 thlenga sak phalna te an rel a,  ADA-in a chhawr Drawing siamtu technical personnel te kaihhruaina dan tur te, Drawing siamna man bituk fel te bakah in chhawng thum chin sa tur tan ADA-in Drawing siamsak dan tur te, Drawing siamna Fees atan insak senso pumpui atanga chhuta 0.05% bituk te an rel bawk. ADA Meeting chuan Bawngkawn atanga Leitan inkar kawngpui dung chu leimin fo na hmun himlo leh hlauhthawnawm ah ngaiin insak khap ni se tih te an rel bawk a ni. Heng thurel te hi Sawrkar-ah Cabinet pawmpui turin  la thehluh tur a ni.   
    
ADA din tirh atanga ni 13 August, 2010 thlenga insak dilna dawn tawh zawng zawng 2268 zingah 2002 hnenah phalna pek a ni tawh a, 136 chu ngaihtuah mek niin 741 hnenah titawp tura thu pek an ni. Insak lai thiat tura ngaihtuah mek chu 78 a awm a, 30 te chu thiat tura thu pek an niin 1 chu thiah a ni tawh bawk a ni.