Vawiin khan Aizawl Development Authority chu UD &PA Minister Pu Zodintluanga hovin Secretariat Conference Hall-ah an thukhawm.

Vawiin thutkhawmnaah hian ADA Building Regulations hnuaia insak phalna dil zat ni 16 thla 9 thlenga hmuh tarlan a ni a. Insak dilna hmuhzat 3570 ; phalna pek zat 3326; dilna hnawl zat 105; insak chhunzawm phalloh 862 leh inthiahtir 1 an awm. Building Regulations hi Aizawl Municipal Council huamchinah chuan ADA hian a khawih zui tawhlo a, AMC huamchin piahlam ADA huamchhung a awm veng 14 erawh ADA hian a enkawl zui mek a ni. Master Plan for Aizawl-Vision 2030 chungchang sawiho niin hei hi September ni 1 atang khan a duh apiang hmuh theih tur leh sawiselna nei te tan sawisel theihna hun tun thla ni 30 thleng hawn a ni a. Tun thla chhung hian he Master Plan hi Council of Ministers te, ADA member te leh AMC ten lo enin zirchianna hun buatsaihsak tum an ni.

Vawiin meeting a an ngaihtuah ho zingah hian ADA Act, 2005 siamthat chungchang te; insak phal dilna form Rs. 20 ni thin Rs. 25 a tihpun te; Design/ Planning Cell tihlen leh Master Plan bawhzui zel dan tur te pawh a tel.