Ramchhung State 28, Puducherry UT leh NRRDA kaltlang thingtlang hmun kilkhawr tlawpawhna tur kawngpui sialna senso atan National Bank for Agriculture and Rural Development (NABARD) chuan thlahlui ni 30, 2011 thleng khan cheng vaibelchhia 1,02,844 a pe chhuak tawh a, hei hi rampum huapa thilchhinchhiah tlak lang tham a tling.

Mizoram sorkar tan NABARD hian Project 178 a sanction tawh a, heng zinga 141 chu thawh zawh a ni tawh nghe nghe. Tun dinhmunah heng Project hrang hrang thawh nan NABARD chuan cheng vaibelchhia 200.79 a pechhuak tawh a. Sum pekchhuah 52% vel chu thingtlang kawngpui leh leilawn dawh nan hman a ni a, 14% chu kawlphetha tenau leh thingtlanga tuithianghlim in tur pek nan te hman niin 8% chu tuiluankawr siam leh tui lian dan nana a hman a ni a, a bak 6% chu tuilak kawng siam nan hman an ni. Mizorama hmalakna an neih zinga langsar zual deuh te chu Champhai District a Tlawva Small Hydel Project siam te, W. Phaileng leh Marpar inkar kawng sial te, thingtlang khaw tam taka tui thianghlim in tur pek te leh Aizawl khawpui chhunga ran talhna hmun leh sathianghlim zawrhna dawr bakah khawpui chhung tuiluankawr siam te an ni. Heng an ruahmanna avang hian mi tam tak tan inhlawhna a siam a, khawtlang mimir nun chawikangin khawtlang tana rotling tui intur pekna ang chi te a thlen a ni.

RIDF hi 1995-96 khan sorkar laipui leh NABARD ten vaibelchhe 2000 a bul tana an din a ni a. Kumin sorkar kum kal mekah hian State engemawzatah Agriculture thar chhuah dahna hmun liantham tak tak sakna tur sum dah a ni. Hetiang taka thingtlang mi cheng te tana thil chenfakawm a ruahman thin tihchangtlun lehzual nan NABARD chuan Nabard Infrastructure Development Assistance (NIDA) a din bawk a ni.