Kolasib-a YMA General Conference vawi 66 na naktuka tan tura a tula hman turin Rs. 4 lakh (cheng nuai 4) ONGC ten vawiin khan bialtu Minister, Conference Organising Committee Chairman nibawk Pu P.C. Zoram Sangliana hnenah an hlan.

ONGC General Manager chuan cheng nuai 4 cheque hi Pu P.C. Zoram Sangliana hnenah DC Conference Hall-a inkhawm tawi neihah a hlan a. Thu sawiin, YMA chu tanpui ngaite puitu, politics thil tel lova ram leh hman tana thawktu an nih avangin a ropui hle a. ONGC in a tul hun taka Conference hautak tak thlen kawnga hmalakna atana pawisa tam tak a pe chu lawmthu a sawi a ni.

General Manager ONGC chuan YMA te hnathawh leh rawngbawlna chhuanawm taka tel ve na remchang tak ni a an hriat avangin lawm takin pawisa an pe tih a sawi a. Oil laihchhuah hna an thawhna kawngah Mizoram sorkar leh Kolasib DC ten harsatna an tawh apianga an puih thin avanga an lawmzia a sawi a ni.

Pi Niharika Rai, IAS, DC pawhin thu sawiin, DC a nih laia Kolasib-in Conference a thleng chu vanneihthlak a tih thu a sawi a. YMA hnathawh dan chu thil ropui tak khawvel zau zawk pawha entawn tlak nia a hriat thu sawiin hnam dang ka nih anga ka thlirna ah chuan YMA hnathawh hi ka fak a ni, a ti.

Pu Lalrinawma Ngente, Organising Secretary, YMA General Conference chuan khawmpui thlen tur chungchangah report tawi pein ONGC in phal taka tanpuina cheng nuai 4 an hlan chu a lawmthu a sawi a ni.

Pu Zairemmawia, Addl. DC, Kolasib chuan cheque hlanna inkhawm hi a kaihruai a ni.