DIRECTORATE OF INFORMATION & PUBLIC RELATIONS, Government of Mizoram, India

2798/2022-2023

Sahmulphah thla ni 25, 2022: Lawngtlai East bialtu MLA, Agriculture Development Board Vice Chairman Pu H. Biakzaua chuan tukin zingkar khan Lawngtlai East MLA Local Area Development Fund hmanga Government Lawngtlai College (GLTC) Canteen sak thar chu a hawng.

Canteen building thar hawnnaah Pu H. Biakzaua chuan Chief Minister leh Education (Higher & Technical leh School) changtu Minister te'n Mizorama zirnain hma a sawn a, zirna hmunhma leh hmanruate tihchangtlun a nih theih nan theih tawp chhuaha hma lain, zirna lama sawrkar sum sen pawh a tam hle tih a sawi a. GLTC tana hma laknaah pawh PMJVK aṭangin auditorium sakna hmuh tawh leh sak mek niin, project dang ruahmanna pawh kalpui mek a nih thu a sawi a. Thawktu indaih lohna phuhruk turin hna ruak eng emaw zat hnawh khahna tur buaipui mek a nih thu leh lak theih thuai beisei a nih thu a sawi bawk.

Pu H. Biakzaua chuan COVID-19 hri leng leh raltlan boaruak avang te'n beisei lawk loh lamah MLA Fund tam tak a kal chungin, a awm ang ang hmasawnna hna hrang hrang thawh nan ṭha taka hman a ni thei ṭhin chu lawmawm a tih thu a sawi a. Tun ṭumah pawh MLA Fund cheng nuai nga hmanga GLTC Canteen building ṭha tak sak a ni leh ta chu lawmawm leh chhuanawm a tih thu sawiin, GLTC chu Lawngtlaia zirna sang ber a nih angin NAAC Accreditation hmu tura hma la mek a thawktute chu zirna kawnga ṭan la thar zel tur te, College hmunhma leh hmanrua tihchangtlun kawngah neitu an nih anga ṭhahnem ngaih chhuah zel tur te'n a fuih a. GLTC phuisui zelna tur leh changtlun zelna tur chu sawrkar, thawktute leh zirlaite kutah mai ni lo, ram mipuite kutah pawh thui tak a innghah thu sawiin, amah ngei pawhin GLTC mamawh ngaihtuah kawngah theih tawp chhuahpui chhunzawm zel a tum thu a sawi.

GLTC Canteen building thar hawnna hun hi College Vice Principal Pu LH Mawia Hnyaloom chuan a kaihruai a. Assistant Professor Pu C. Lalthlamuana'n hunserh hmangin, Assistant Professor Pu J. Lalrinawma hnen aṭangin Canteen building sak hna kalpui dan technical report ngaihthlak a ni a. Associate Professor Pu Mc. Lalrokhuma'n lawm thu sawiin hun a khar a ni.

GLTC Canteen building thar hawnnaah hian ADB Vice Chairman Pu H. Biakzaua hi LADC-a MDC Pu K. Hre Kung leh MNF District Headquarters hruaitute'n an ṭawiawm a. He hunah hian Principal Pu Js. Fanchun hovin GLTC-a zirtirtute leh thawktute an tel a ni.

GLTC Canteen building thar hi Lawngtlai East MLA LAD Fund ₹ nuai 5 hmanga sak a ni a. A chhung hi feet 24x24 (square feet 576)-a zau niin, choka hian feet 12x3 (square feet 36)-a zau a awh a. A building-in a luah chin pumpui chu square feet 612 a ni. August ni 22, 2022 aṭanga sak ṭan niin, November ni 15, 2022 khan sak zawh a ni a. A sak hna thawh nan hian ni 46 hun hman a ni.

Canteen building thar hawnna hun hman zawh hian Pu H. Biakzaua chuan College Auditorium tur sak mek chu tlawhin, hna thawh chin a en nghal a ni.

Attachment