2797/2022-2023
Aizawl, the 25th November 2022: Vawiin khan Mizoram Architect Forum (MAF) chuan Auditorium, ATI, MINECO-ah Architects Meet 2022 a buatsaih a. He Architect intawhkhawmna lianah hian Governor Hari Babu Kambhampati chu khuallian a ni.

Architects Meet 2022 hi hun li – hawnna inkhawm, seminar leh sawihona hunah te then a ni a. Architect hna thawk mek leh architect zirlai ten India rama Architect hlawhtling pahnih - Ar. Sanjay Mohe, Mindspace Architects leh Ar. Prashant Pradhan, PP Architects te hnen atangin fuihna thu leh an hna thawh atana thil tangkai tak tak an ngaithla a ni.

Governor Hari Babu Kambhampati chuan kan hmunawl neih te tangkai tak leh midangte tana hnawk lova chenna hmun leh in sak chungchangah Architect te mamawhna leh pawimawhna tunhma zawng aiin a nasa tawh a. Mizoramah chuan hmundangte angin ram zau tak tak leh hmun rem tha duh anga zau kan nei thei lova. Kan in sak dan leh hmunawl kan hnawhkhah danah te pawh kan fimkhur zual bik a ngai a. Aizawl khawpui tawt lutuk leh Mizorama District khawpui lian deuhah te pawh kan inhnawh tawt mek a, Architect te rawn nachang hriat kan intihhmuh zel hi a ngai tawh a ni a ti.

Mizoram chu Lirghing thlen duh bikna hmunah pawh a ralti lai ber - Zone-V Earthquake Classification huamchhungah a awm tih kan hriat reng a ngai tih a sawi a. Hei bakah hian leimin awm duhna hmun leh chhiatrupna thlen thei thil dang vanga hmun him lo a ni tel a. Kan insak dan te hian kan him leh him lohna tur kawngro a su a. Chuvangin in sak nghet tha leh him kan neih theih nan Architect rawn na chang te kan hriat a, an pawimawhna te hi kan hmuh chian a ngai a ni a ti. Governor chuan Architect te chu khawvel sik leh sa danglam chho zel leh khawvel tunhma aia lo lum chho zelah engtin nge a siam tha zawnga ke kan pe ve ang tih lam hawia an ngaituahna te seng turin a chah a. Architect ten ruahmanna an siam hmain environment nghawng thil a ni nge ni lo tih te an ngaihtuah hmasak fo a ngai a. Mizoramah kawlphetha indaihlohna te pawh hre chiang a, inchung design an siam thinah te Nizung chakna hmanga kawlpetha siam (Solar Rooftop design) te uar tel turin a chah bawk a ni.

Full Speech of Governor : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-architects-meet-2022-organized-by-mizoram-architects-forum-at-ati-mineco-aizawl-on-25th-november-2022

Architects Meet 2022 hawnna inkhawm hi Ar. Lalrinzuala Ralte, President, MAF, chuan a kaihruai a. Report a tarlan dan chuan tunah hian Mizoramah Architect hna thawka eizawng zingah MAF member 100 chuang an awm tawh a ni. Ar. Malsawmkima Royte, Vice President chuan lawmthu sawiin huntawp a khar thung a ni.