2796/2022-2023
Saitual 25th November 2022: Tualbung khua chuan kum 100 an tlin (centenary) lawmna bultanna inkhawm nizan khan Tualbung Tahreuh kawnah an buatsaih a, Assembly Speaker Pu Lalrinliana Sailo chuan he hun hi hmanpuiin Tualbung Community Healthcare Scheme a tlangzarh nghal a ni.

Pu Lalrinliana Sailo chuan he hunah hian thusawiin Tualbung khuain kum 100 a tling thei chu lawmawm a tih thu leh he huna a telpui thei chu a lawm thu a sawi a. Tualbung khuain Health Care Scheme tha leh felfai tak mai ngaihtuahna chang an hria chu ropui a tih thu sawiin, khaw dangte tan pawn entawntlak tak an ni, a ti. A bial chhungah ngei Health Care Scheme tha tak a hawng thei chu a lawm thu leh MLA a nih chhung chuan buaipui leh enzui pui reng a inhuam thu a sawi bawk. Tualbung Community Health Care Scheme atan hian cheng nuai khat a hlan nghal a ni. Tualbung khuain kum za an lawmna chuan inlungrualna tha thlen se a duhsak thu leh inhuatna leh inhliam palh tawhnaah te pawh inngaidam tawn turin kalkhawmte chu thu a chah a. Midangte chhiatna leh mahni hlawkna chauh zawng a, midangte hliam hreh lo mi ni lo tura fuihin, khawtlang nu leh pa te nena tangruala hmalam pan zel turin a chah a ni.

Pu Lalrinliana Sailo hian Tualbung khuaa kum 70 chung lam mi 47 te hnenah blanket a hlan a, Centenary lawmna leh Hall sak zawmna atan cheng nuai hnih a pe bawk.

He hunah hian Saitual SP Pu J.Lalmuankima chuan mipuite hnenah dan leh a kaihhnawih chungchang inzirtirna hun a hmang bawk a ni.