Vawiin hian Lawngtlai District Additional DC Pu R.L Sangluaia chuan Lawngtlai District level PYKKA Competition 2013 chu Lawngtlai a Central YLA Playground ah a hawng.

Thu sawiin Pu R. L Sangluaia chuan Sawrkar laipui hmalakna a thingtlanga cheng sports lama talent nei thate zawn chhuahna PYKKA Lawngtlai District level Competition 2013 neih a ni leh ta chu a lawm awm hle a, hmun hrang hrang atanga infiammi lokal khawm ten theih tawp chhuaha State aiawh pha khawpa kan beih ngei a ngai a ni a ti. Pu R L Sangluaia chuan infiammi kalkhawmte chu fuihin khawvela infiammi langsar tak takte hi an bul tanna a ropui vek hauh lova a maherawh chu tum ruhna leh insumtheihna nen an thlen chin atang zela hma sawn tumin an beia dinhmun sang takah an inhlangkai thin a ni a ti a, kan ei leh in te, kan hriselna te, kan mut hun leh thawh hun thlengin taksa tana tangkai leh hrisel ber chi zawng zelin kan inruahman thin tur a ni a ti bawk.

Khuallian chuan zirna leh infiamna hi thil kal kawp tlat nia a hriat thu sawiin lehkha thiam tan infiamna ah thlen san a sam zawk hle a rinawm tiin infiam mi kalkhawm te chu an zirna hlamchhiah hauhlo turin a chah bawk.

District Level PYKKA Sport hi ni 22 – 25 October chhung awh tura ruahman a ni a, Block hrang hrang pali Lawngtlai Block, Bungtlang South Block, Sangau Block leh Chawngte Block atangin Block aiawha intihsiakna a ti tha te theuh kal khawmin infiamna hrang hrang ah an inel ang a, a ti tha thlan chhuah ten District aiawh turin State Level ah an chhuak leh dawn a ni.